O Son do Camiño pechou na madrugada deste domingo unha nova edición no Monte do Gozo tras tres días de concertos, calor e afluencia masiva. Máis de 125.000 persoas pasaron polo recinto ao longo da fin de semana, cunha media superior ás 40.000 por xornada, nun festival que volveu alterar o ritmo habitual de Santiago e converter a cidade nun dos principais focos musicais do Estado durante estes días.
A última xornada tivo tamén presenza galega desde as primeiras horas, con nomes como Sarria, Ortiga, Carlangas ou Sen Senra antes da chegada dos grandes reclamos da noite, entre eles Lola Índigo, Afrojack ou DJ Snake. Fóra dos escenarios, a imaxe foi a habitual dun macrofestival destas dimensións: entradas e saídas escalonadas, colas, calor, abanicos, e unha cidade que notou o impacto nos aloxamentos, na hostalaría, no transporte e nas rúas.
Ver esta publicación en Instagram
Segundo os datos difundidos arredor da cita, os desprazamentos en tren cara Santiago medraron un 31% durante os días do festival, mentres que a edición anterior deixou un impacto económico estimado de máis de 23 millóns de euros. Son cifras que explican o peso que O Son do Camiño acadou dentro e fóra de Galicia, pero tamén a escala dun evento que xa vai moito máis alá dunha programación de concertos no Monte do Gozo.
Ese crecemento chega, ademais, nun momento no que o modelo dos grandes festivais está especialmente observado. A presenza de fondos de investimento como KKR no sector, a través de estruturas empresariais que controlan ou participan en numerosos macroeventos, abriu nos últimos meses un debate sobre quen está detrás destas citas, que papel queda para a escena local e como se reparte o valor que xeran. O Son do Camiño pecha outra edición multitudinaria; a pregunta, agora, é que festival quere ser a partir de aquí.
