O Monte do Gozo ultima os preparativos para acoller unha nova edición do Son do Camiño, que se celebrará entre o xoves 18 e o sábado 20 de xuño en Santiago de Compostela. O festival prevé reunir durante tres xornadas a máis de 125.000 persoas, nunha cita integrada nos Concertos do Xacobeo e considerada pola Xunta como un dos principais eventos musicais de Galicia.
O director de Turismo de Galicia, Xosé Merelles, e o comisario do Ano Santo Xacobeo 2027, Marcos Gómez, visitaron este martes o recinto no que terá lugar a sétima edición do festival. Segundo recolle a Administración autonómica nun comunicado, trátase de “unha cita consolidada como o maior festival do norte de España e un dos eventos musicais de referencia do país”.
A Xunta enmarca o festival dentro da súa estratexia de promoción turística vinculada á música en directo. Nese contexto, sinala que O Son do Camiño “reafirma” o seu papel como escaparate da marca Galicia Calidade e como instrumento de difusión exterior de Santiago de Compostela, do Camiño de Santiago e do conxunto da comunidade.
Merelles destacou que, nas últimas edicións, máis do 40% do público procedía de fóra de Galicia, cunha presenza significativa de asistentes chegados de Portugal, Reino Unido, Suíza e Italia. Segundo indicou, esta evolución contribúe a consolidar o festival como “unha plataforma de proxección internacional para Santiago de Compostela, o Camiño de Santiago e Galicia”.
A programación musical desta edición inclúe máis de 40 artistas e bandas nacionais e internacionais. Entre os nomes anunciados figuran Linkin Park, Katy Perry, Dani Martín, Lola Índigo, Biffy Clyro, Afrojack, Guitarricadelafuente e Hoobastank. O cartel incorpora tamén presenza galega, con artistas como Sen Senra e Carlos Ares.
A proposta complétase cun escenario dedicado á música electrónica, no que están previstas máis de 18 actuacións. Nesta parte do programa participarán, entre outros, Jimi Jules, Patrick Mason, HAAi, DJ Gigola e Héctor Oaks.
Marcos Gómez puxo o foco na dimensión musical e turística do evento, ao sinalar que “o festival demostra ano tras ano a súa capacidade para impulsar unha programación musical de primeiro nivel e para converter a música nun instrumento de promoción turística, dinamización económica e proxección internacional de Galicia Calidade”.
No plano económico, a Xunta lembra que a edición do ano pasado superou os 23 millóns de euros de impacto económico e xerou ao redor de 5.000 postos de traballo, entre directos e indirectos. Tamén sinala que a celebración do festival contribuíu a acadar niveis de ocupación hoteleira do 100% tanto en Santiago como na súa área de influencia durante os días do evento.
