O portavoz municipal do PP en Santiago, Borja Verea, presentou este luns unha proposta para poñer en marcha unha primeira rede de cociñas propias nos centros educativos composteláns, cunha fase inicial prevista en tres colexios: Mestre Rodríguez Xixirei, Ramón Cabanillas e Lamas de Abade. Segundo explicou, o obxectivo é avanzar cara a un modelo no que a comida se prepare no propio centro no que comen os nenos e nenas, fronte ao sistema baseado no transporte desde unha cociña central.
Verea enmarcou esta iniciativa na serie de propostas que o seu grupo vén presentando nas últimas semanas arredor das familias, entre elas o programa de inmersión lingüística en Irlanda, a rede de campamentos de verán, o servizo municipal de canguraxe ou a denominada ‘casa das familias’. O portavoz popular sinalou que todas estas medidas responden á vontade de “construír un Santiago que pense máis nas familias e na vida real da xente”.
A nova proposta céntrase nos comedores escolares e, en concreto, na calidade e proximidade da alimentación. Verea afirmou que para moitas familias é unha cuestión relevante “saber que comen ben” e “saber que a comida é de calidade”. Nesa liña, defendeu que existe unha diferenza entre transportar comida xa preparada e elaborala no propio colexio, unha diferenza que vinculou coa “proximidade”, a “confianza” e a “calidade do servizo”.
A primeira fase que propón o PP afectaría a tres centros con características distintas. No caso do Mestre Rodríguez Xixirei, a cociña estaría dimensionada para 80 comensais; no Ramón Cabanillas, para 200; e no Lamas de Abade, para 260. En conxunto, segundo os datos expostos por Verea, a medida permitiría que máis de 500 nenos e nenas de Santiago comesen alimentos preparados no seu propio centro educativo.
O portavoz popular sostivo que a proposta está baseada nos informes técnicos municipais e cuestionou a interpretación que, segundo dixo, fixo o goberno local sobre a viabilidade das cociñas propias. Verea indicou que durante este tempo se trasladou a idea de que non era posible instalar cociñas nos colexios, mais asegurou que os documentos municipais demostran “todo o contrario”. Ao seu xuízo, o problema está na premisa coa que se elaborou o informe, xa que, segundo explicou, preguntaba pola posibilidade de instalar en cada escola unha cociña con capacidade para 1.000 menús.
“Se o obxectivo era unha cociña en cada escola, a pregunta tiña que ser se cabe unha cociña para 80 comensais en Rodríguez Xixirei”, afirmou Verea. O portavoz popular engadiu que, baixo ese enfoque, si habería centros nos que sería posible instalar cociñas propias, mentres que noutros casos habería que optar por fórmulas de proximidade adaptadas a cada realidade.
Verea rexeitou o modelo de cociña central, ao que se referiu como un sistema de preparación industrial, cátering frío e transporte en furgonetas. Fronte a iso, propuxo unha rede progresiva que comezaría nestes tres centros e que podería ampliarse posteriormente ao resto de colexios da cidade. Segundo explicou, “non todos os centros necesitan a mesma resposta, pero si merecen a mesma ambición”.
O investimento inicial calculado polo PP para a construción, instalación e equipamento das tres cociñas ascende a 1.179.000 euros. A maiores, Verea detallou os custos anuais previstos para o funcionamento do servizo: 79.000 euros no caso do Mestre Rodríguez Xixirei, 194.000 euros no Ramón Cabanillas e 245.000 euros no Lamas de Abade. O portavoz popular indicou que se trataría dun servizo municipal.
Sobre os prazos, Verea sinalou que, no caso de que o seu grupo gobernase, a orde de inicio do expediente podería darse no mes de xuño. A partir de aí, calculou arredor de seis meses para a adxudicación e outros seis para a instalación, polo que as cociñas poderían estar en funcionamento nun prazo aproximado dun ano desde o inicio do procedemento.
O portavoz do PP vinculou esta proposta coa súa idea de situar as familias no centro das políticas municipais. Segundo expuxo, as últimas iniciativas presentadas polo seu grupo abordaron o día a día familiar, as oportunidades educativas, o acompañamento ante dificultades e agora tamén a alimentación nos centros escolares. Verea pechou a súa intervención defendendo a necesidade de “construír un Santiago máis amable, máis moderno e máis pensado para a vida real da xente”.
