O Grupo Municipal Socialista denunciou este martes que a última modificación da relación de postos de traballo aprobada polo Goberno municipal evidencia, ao seu xuízo, unha falta de planificación na xestión administrativa do Concello de Santiago. A concelleira Marta Abal advertiu de que o expediente foi aprobado malia contar cun informe negativo da Intervención municipal.
Segundo explicou a edil socialista, esta modificación afecta á unidade de tramitación de facturas que o propio Goberno local puxera en marcha ao inicio do mandato. Abal lembrou que daquela o executivo de Goretti Sanmartín decidiu centralizar a xestión das facturas na Coordinación Xeral, unha medida coa que o PSOE xa amosara a súa discrepancia.
A concelleira sostén que as facturas deben ser tramitadas pola unidade que executa o gasto, ao ser esta a que coñece o contrato, o servizo prestado e o expediente correspondente. Por iso, considera que a decisión inicial do Goberno local xerou un modelo que agora o propio executivo estaría a rectificar sen ofrecer unha alternativa concreta.
Abal enmarcou esta crítica na situación económica do Concello, ao sinalar que existen máis de 15 millóns de euros en facturas pendentes, un período medio de pagamento elevado e a obriga de acudir ao Fondo Estatal para facer fronte aos pagamentos a provedores.
Neste contexto, a representante socialista criticou que o Goberno municipal amortice agora sete postos da unidade que fora creada para a tramitación de facturas. Segundo Abal, o executivo local non detallou que estrutura ou procedemento substituirá ese sistema, senón que remitiu esa definición a unha fase posterior, vinculada ao funcionamento da nova aplicación de contabilidade.
“Mentres tanto, as facturas seguen acumulándose e os provedores seguen sen cobrar en prazo”, afirmou a concelleira socialista, que cualificou a decisión como unha mostra de improvisación administrativa.
Para o PSOE, a modificación da RPT non responde ás necesidades actuais do Concello nin garante unha solución inmediata ao problema dos pagamentos pendentes. Abal incidiu en que “non se pode aprobar unha relación de postos de traballo así sen planificación, sen dar respostas reais ás necesidades do Concello e cun informe desfavorable da Intervención municipal”.
