O Partido Popular de Santiago reclamou ao goberno municipal de BNG e Compostela Aberta que execute o contrato de sinalización intelixente do patrimonio cultural, unha actuación que, segundo a concelleira María Baleato, está destinada a mellorar a información turística e a reforzar a difusión do legado histórico e cultural da cidade. Pola súa banda, a alcaldesa, Goretti Sanmartín, asegurou a preguntas de Xornal de Compostela que o contrato “xa está executándose nestes momentos”.
A edil popular lembrou que o contrato incluía a elaboración dun plan integral de sinalización turística do patrimonio cultural, a posta en marcha dun sistema de información turística e a instalación de novos elementos de sinalización intelixente distribuídos polo termo municipal. Segundo Baleato, trátase dunha intervención que debería contribuír a mellorar a experiencia das persoas visitantes e a visibilizar os recursos patrimoniais de Santiago.
O PP sinala que o expediente foi licitado o 26 de maio de 2023, cun orzamento próximo aos 600.000 euros, e adxudicado o 17 de abril de 2024 por 459.800 euros. O contrato, segundo indicou Baleato, asinouse o 29 de maio de 2024 e tiña un prazo de execución dun ano, sen posibilidade de prórroga, polo que debería estar finalizado o 29 de maio de 2025.
A formación popular sostén que, ante os atrasos acumulados, o goberno local aprobou o 26 de maio de 2025 unha prórroga extraordinaria de oito meses, que situou a nova data límite no 28 de xaneiro de 2026. Baleato afirmou que nesa data, cando o contrato debía estar rematado, o executivo municipal autorizou unha segunda ampliación do prazo de execución, desta vez por outros seis meses, ata o 28 de xullo de 2026.
A concelleira do PP advertiu de que, “estando a piques de rematar esta segunda ampliación do prazo e de comezar o verán, a cidade segue sen contar cos elementos de sinalización comprometidos nin se observan avances visibles na implantación deste sistema intelixente”. Na súa valoración, “o máis preocupante non é só o atraso, senón a incapacidade do goberno de BNG e CA para sacar adiante un proxecto que eles mesmos consideraron prioritario”.
Baleato pediu ao executivo local que realice as xestións necesarias para garantir a execución inmediata do contrato e a instalación dos elementos previstos. A concelleira popular enmarcou esta situación na crítica do seu grupo á xestión municipal, ao considerar que o goberno local “acumula proxectos anunciados pero sen resultados visibles para a cidadanía”.
Preguntada por Xornal de Compostela sobre este asunto, a alcaldesa de Santiago, Goretti Sanmartín, rexeitou que o proxecto estea paralizado e afirmou que a execución xa comezou. “Ese contrato de patrimonio xa está executándose nestes momentos”, indicou a rexedora, que precisou que xa se iniciou a colocación de sinalización vinculada a elementos patrimoniais.
Sanmartín explicou que a actuación continuará nas próximas semanas e atribuíu a posible falta de percepción pública a que a instalación non se está realizando de maneira simultánea en todos os puntos previstos. “Quizais non é o suficientemente visible porque non se puxeron todos os carteis e toda a sinalización de repente”, sinalou.
A alcaldesa apuntou que o proxecto inclúe tótems nas entradas e saídas da cidade e sinalización en puntos concretos da cidade histórica. Tamén lembrou que a concelleira de Turismo xa deu explicacións sobre os lugares previstos e que o asunto foi tratado nunha comparecencia no último pleno municipal.
Sanmartín engadiu que o goberno local poderá facilitar a relación dos espazos nos que está prevista a instalación dos novos elementos de sinalización. “Está executándose nestes momentos”, insistiu a rexedora, en resposta ás críticas formuladas polo Partido Popular.
