O concelleiro de Mobilidade, Convivencia e Centros Socioculturais de Santiago, Xan Duro, respondeu ás declaracións da secretaria xeral do PPdeG, Paula Prado, que este xoves describiu Compostela como unha cidade “sucia, de ratas, insegura e de narcopisos” e reclamou máis actuacións do goberno local en materia de limpeza e seguridade.
Duro considerou que as palabras da dirixente popular “valóranse por si mesmas” e cualificounas como unha “ensarta de lugares comúns” e de expresións “totalmente fóra do lugar”, tanto se se aplican a calquera cidade como, de maneira particular, a Compostela. O edil advertiu ademais do efecto que, ao seu xuízo, teñen este tipo de mensaxes sobre a imaxe do municipio.
“Eu creo que non se dan conta do dano que fan ao conxunto do municipio con ese tipo de declaracións extemporáneas, fóra de lugar e rozando o maleducado”, afirmou Xan Duro, en referencia ás críticas formuladas polo PPdeG e polo grupo municipal popular.
O concelleiro evitou facer unha lectura triunfalista da situación, mais defendeu que os datos oficiais de criminalidade apuntan a unha evolución positiva no primeiro trimestre de 2026 en comparación co mesmo período de 2025. Segundo explicou, a criminalidade convencional, sen incluír os ciberdelitos, baixou un 20% en Santiago.
Duro detallou tamén descensos noutros indicadores recollidos polo Ministerio do Interior. Segundo indicou, os delitos de lesións baixaron un 37%, os delitos contra a liberdade sexual tamén descenderon arredor dun 37% e os roubos con violencia e intimidación rexistraron unha caída do 38%. O edil puxo o foco, ademais, nos delitos graves ou menos graves de lesións e nas riñas tumultuarias, que, segundo os datos aos que se referiu, baixaron preto dun 37%.
O responsable municipal lembrou que o Partido Popular viña insistindo nos últimos meses no incremento destes delitos durante o ano anterior e contrapuxo esa mensaxe cos datos máis recentes. Con todo, recoñeceu que non todos os indicadores son positivos e sinalou que existe un repunte nos roubos en domicilio. Segundo Duro, este tipo de episodios poden responder á actividade concreta de grupos dedicados a estes delitos e poden variar cando se producen detencións.
“Temos un repunte nos roubos en domicilio, xa ten pasado noutras ocasións; o mesmo o trimestre que vén baixa, porque ese grupo que se dedica a roubar nos pisos é detido e entón baixan os incidentes”, explicou.
Xan Duro insistiu en que o goberno local non pretende minimizar a preocupación cidadá arredor da seguridade. “Todo o que veña da seguridade preocúpanos e ocúpanos”, afirmou, antes de subliñar que unha cousa son os datos estatísticos e outra as percepcións que pode ter a veciñanza sobre o que acontece nas rúas.
Nese sentido, o concelleiro sinalou que este asunto foi abordado na Xunta Local de Seguridade celebrada esta semana e apuntou que o reto do Concello é lograr que a mellora que reflicten as cifras oficiais se traduza tamén nunha maior sensación de seguridade entre a cidadanía. “Temos que ser capaces de que estes datos se convertan en percepción, e niso estamos traballando”, indicou.
Duro defendeu así o labor que están a desenvolver tanto a Policía Local como a Policía Nacional en Santiago e considerou que os datos actuais “desmontan” o discurso do PP sobre a situación da cidade. O edil afirmou que non quere cualificar ese discurso como “populista” porque, ao seu xuízo, “non chega nin a iso”.
As declaracións de Xan Duro chegan despois de que Paula Prado situase a seguridade e a limpeza urbana no centro das críticas ao goberno municipal de Goretti Sanmartín. A secretaria xeral do PPdeG tamén apuntara ao subdelegado do Goberno na Coruña, Xulio Abalde, polas vacantes na Policía Nacional e reclamara máis efectivos para atender as necesidades de Santiago.
Fronte a esa lectura, o concelleiro compostelán defendeu que a evolución da criminalidade en Santiago debe analizarse con datos e non con mensaxes que, segundo afirmou, proxectan unha imaxe negativa da capital galega.
