A Garda Civil, coa colaboración da Policía Local de Ames, detivo dúas persoas e investiga unha terceira pola súa presunta relación con varios delitos contra o patrimonio cometidos no núcleo urbano do Milladoiro. En concreto, atribúenselles supostos delitos de roubo con forza, furto e estafa, segundo informou a Comandancia da Coruña.
A investigación, denominada ‘Operación Quimique’, comezou o pasado mes de marzo, despois de que os axentes detectasen un incremento deste tipo de feitos no Milladoiro. A maior parte dos casos correspondían a roubos con forza no interior de vehículos estacionados en garaxes comunitarios, así como a furtos cometidos tamén nestes espazos.
Segundo as mesmas fontes, os sospeitosos accedían aos aparcadoiros durante a noite, aproveitando a entrada ou saída de vehículos das persoas residentes. Unha vez no interior, subtraían diferentes efectos, entre eles pezas deportivas, documentación persoal, diñeiro en efectivo, dispositivos electrónicos, ferramentas ou bicicletas.
O valor total dos obxectos roubados supera os 7.000 euros, segundo a estimación dos investigadores.
No marco das pescudas, o pasado 16 de maio foi localizado e detido o principal sospeitoso, un home de 36 anos. Tamén foi arrestada a súa parella, unha muller de 19 anos, á que se lle atribúe unha presunta colaboración na venda dos efectos roubados nun establecemento de compravenda de segunda man.
Ademais, a Garda Civil investiga outro home de 23 anos pola súa suposta participación directa na loxística dos roubos. Os investigadores tamén constataron o uso fraudulento dunha tarxeta bancaria subtraída nun establecemento de máquinas expendedoras do Milladoiro, polo que aos implicados se lles atribúe tamén un presunto delito de estafa.
A actuación permitiu recuperar parte dos obxectos roubados, que xa foron devoltos aos seus propietarios. As dilixencias foron remitidas ao Tribunal de Instancia de Santiago.
