O artista Lg1do, con 18 anos e criado en Santa Comba, lanzou por sorpresa este xoves o seu primeiro álbum, Sobresaliente, que fixo coincidir co último día das Probas de Acceso á Universidade (PAU). El mesmo realizounas este ano e con elas puxo fin á súa etapa de Bacharelato, que pecha cunha media de 9,5. Ambos os acontecementos —o disco e a fin de exames— celebraraos este xoves cun concerto en Santiago de Compostela, que terá lugar ás 21:00 horas no Parque de Belvís, dentro dun festival organizado á mantenta, ‘A Gradación’.
O evento, que contará con invitados como 9Louro e Kid Mount, foi anunciado hai varios días, pero non foi ata este xoves cando o artista revelou que contará coa súa presenza para celebrar o lanzamento da ‘mix-tape’, que realizou ás 12:00 horas, coincidindo xusto co seu último exame. Este proxecto de nove cancións é un novo paso dentro dunha carreira musical que medrou a unha velocidade pouco habitual, segundo destaca o seu equipo. Unha das primeiras cancións de Lg1do, ‘Darche‘ —a piques de chegar ao millón de reproducións—, púxoo no mapa de moitos hai uns meses ao entrar na lista de Spotify coas 50 cancións máis virais de España.
Antes da saída do proxecto, as tres cancións adiantadas (‘VOAR’, ‘Non Cúlpesme’ —con 9Louro— e ‘Bye Bye’) xa acumulaban outro millón de escoitas. A primeira delas contou co apoio do Deportivo da Coruña na súa promoción, o que o levou a actuar na previa do partido entre o Deportivo e As Palmas. Así, ‘Sobresaliente’ funciona como a súa gran carta de presentación, que inclúe unha introdución do vigués Dirty Suc, que aparece simbolicamente como unha voz que dá o relevo a unha nova xeración. Agora, Lg1do enfrontarase este verán a unha xira programada por toda Galicia con máis dunha vintena de datas por diante.
