Ao redor de 40 vehículos participaron este martes en Santiago de Compostela nunha caravana reivindicativa convocada polas organizacións sindicais dos sectores da discapacidade, menores e educación infantil 0-3 anos para reclamar melloras nas condicións laborais, salariais e asistenciais. A mobilización forma parte dunha campaña de protestas coa que os traballadores buscan denunciar a situación que atravesan estes ámbitos e esixir avances na negociación das súas demandas.
As accións continuarán este mércores cunha manifestación que partirá ás 11:00 do Monte do Gozo e rematará diante do complexo administrativo de San Caetano, coincidindo cunha xornada de folga á que está chamado o persoal das escolas infantís de 0 a 3 anos dependentes da Consellería de Política Social.
As centrais sindicais convocantes aseguraron que as condicións de traballo nestes servizos son “cada vez máis precarias” e acusaron á Administración de non atender unhas reivindicacións que consideran necesarias tanto para mellorar a situación laboral dos profesionais como para garantir unha atención adecuada ás persoas usuarias.
Entre as cuestións que denuncian figuran salarios que en moitos casos apenas superan o Salario Mínimo Interprofesional, ratios que consideran excesivas, unha crecente carga física e emocional asociada ao traballo e as dificultades para compatibilizar a actividade profesional coa vida familiar.
No ámbito da discapacidade e da atención temperá, os traballadores reclaman a aplicación dos incrementos salariais previstos no XVI Convenio Estatal, así como a creación dunha mesa de negociación na que participen Administración, sindicatos e patronais para abordar un complemento salarial autonómico. Tamén solicitan máis persoal e recursos materiais que permitan reducir ratios e reforzar a atención ás persoas usuarias.
Pola súa banda, os profesionais do sector de menores demandan que a Administración cumpra cos pagamentos ás entidades xestoras e que estas apliquen o acordo retributivo autonómico recentemente asinado, co obxectivo de garantir o cobro das táboas salariais establecidas no V Convenio Estatal. Ademais, reclaman medidas para avanzar na equiparación salarial entre centros, reducir ratios e mellorar tanto os recursos humanos como as instalacións.
No caso da educación infantil de 0 a 3 anos, as reivindicacións céntranse na integración das escolas infantís na Consellería de Educación para reforzar o seu recoñecemento como etapa educativa, na unificación das táboas salariais do XIII Convenio Estatal e na creación dunha mesa tripartita galega que permita negociar un complemento autonómico. As organizacións sindicais tamén solicitan unha redución das ratios e máis recursos para mellorar a calidade educativa.
