A sede compostelá da Audiencia Provincial da Coruña xulgará o vindeiro mércores e xoves a dúas persoas acusadas de prender lume a un local de lecer nocturno en Santiago ao que lles negaron a entrada. Segundo recolle o escrito de acusación fiscal, os feitos sucederon na madrugada do 25 de xaneiro de 2023, cando os dous procesados tentaron entrar nun establecemento ao que tiñan vetado o acceso.
Cando os encargados de seguridade lles dixeron que non podían entrar, os dous procesados ameazáronos de morte e, posteriormente, tentaron prenderlle lume ao local. Para iso, desprazáronse ata unha gasolineira próxima, onde adquiriron un bidón de gasolina e entraron por unhas galerías anexas ao inmoble ata un acceso de emerxencia. Neste lugar, onde se atopaban unhas 200 persoas, deixaron o bidón e prendéronlle lume.
As chamas afectaron tanto á saída de emerxencia como ás paredes das galerías e a dous locais anexos á discoteca, aínda que non se rexistraron feridos. A Fiscalía considera estes feitos constitutivos dun delito de ameazas, así como doutro delito de incendio, e pide unha pena de prisión de oito anos para cada un dos acusados, así como a prohibición de acceder ao local durante sete anos.
