A Consellería de Educación publicou este venres no Diario Oficial de Galicia (DOG) a orde pola que se establecen os servizos mínimos con motivo da folga convocada entre o persoal da empresa Lacera, encargada das tarefas de limpeza e conserxería nos centros de educación infantil e primaria de Santiago de Compostela.
Segundo recolle a resolución, durante as dúas xornadas de paro, previstas para os días 1 e 2 de xuño, os centros educativos deberán contar coa presenza de un conserxe ou ordenanza durante todo o horario escolar, co obxectivo de garantir o funcionamento básico das instalacións e a atención ás necesidades organizativas dos colexios.
A Xunta xustifica esta medida ao considerar que a custodia e seguridade do alumnado menor de idade constitúe unha responsabilidade esencial da Administración educativa e forma parte do dereito fundamental á educación. Por este motivo, a orde establece a necesidade de manter un servizo mínimo que permita asegurar estas funcións durante o desenvolvemento da folga.
O paro foi convocado pola CIG, que reclama melloras nas condicións laborais e salariais do persoal de Lacera. O sindicato sostén que os traballadores afectados están sometidos ao que cualifica como “o contrato máis precario” do Concello de Santiago, e denuncia a existencia de condicións que considera insuficientes tanto desde o punto de vista retributivo como organizativo.
A mobilización afecta ao persoal que presta servizos de limpeza e conserxería en centros educativos da capital galega, un colectivo que nos últimos días vén denunciando a necesidade de actualizar as súas condicións laborais e de avanzar nunha mellora do contrato que regula a prestación deste servizo.
