O Auditorio de Galicia de Santiago de Compostela acollerá este sábado, 30 de maio, o concerto ‘As rúas do vento ceibe’, unha proposta musical de gran formato ao redor da poesía galega que reunirá a máis de 300 artistas sobre o escenario en homenaxe a Manuel María. Segundo indica a Deputación da Coruña, a iniciativa está incluída na programación do Día das Letras Galegas e toma o seu nome dun libro de Manuel María, pondo música a poemas deste autor, así como a textos de Rosalía de Castro e de Celso Emilio Ferreiro.
O proxecto, impulsado pola Fundación Manuel María, encargou ao compositor Xosé Carlos Serán Olveira a creación musical a partir dos poemas ‘d’As rúas do vento ceibe’, dando lugar a un repertorio de 13 pezas, once delas baseadas en textos do escritor de Outeiro de Rei.
A interpretación correrá a cargo da Orquestra Sinfónica de Pontevedra, coa participación da mezzosoprano Julia Portela e dun coro mipequeno mixto integrado polo Coro de Cámara Thalassa de Marín, o Coro do Hospital de Lugo, o Coro Liceo de Vilagarcía, o Coro Solfa de Compostela e a Sociedade Coral Polifónica de Pontevedra. Participará tamén un coro xuvenil conformado polo IES A Xunqueira de Pontevedra, Voces da Terra Chá de Lugo e o Peque Coro in crescendo do Conservatorio Profesional de Música de Ferrol. A dirección musical será de David Fiuza.
