Santiago de Compostela viviu este domingo, 24 de maio, a xornada central da Festa do Banquete de Conxo, unha cita que volveu situar no primeiro plano os valores históricos e simbólicos asociados a este acontecemento do século XIX. A celebración desenvolveuse arredor das ideas de liberdade, fraternidade e igualdade, principios que marcaron o espírito do banquete celebrado en 1856 e que continúan sendo o eixo da conmemoración actual.
A programación arrancou ás 11:00 na praza do Toural cun desfile teatralizado no que participaron estudantes, artesáns, pandereteiras e outros colectivos, acompañados por música ao longo do percorrido. A iniciativa serviu como punto de partida dunha xornada dedicada a recuperar a memoria dun episodio considerado un símbolo de transformación social na historia compostelá.
Tras o desfile, a alcaldesa de Santiago, Goretti Sanmartín, dirixiuse ás persoas asistentes cunha intervención na que puxo o foco na protección do espazo vinculado ao Banquete de Conxo e no seu valor histórico e patrimonial. “Estamos aquí para celebrar a historia. Tamén o facemos para celebrar e demandar que toda a riqueza patrimonial do Banquete de Conxo continúe estando como está”, afirmou.
A rexedora tamén destacou os principios que acompañan esta celebración antes de dar paso ás representantes das parroquias convidadas nesta edición, Vidán e Eixo. As súas portavoces, Nuria González e Maika González, foron as encargadas de pronunciar o pregón desta edición.
Durante a lectura realizouse unha evocación do contexto histórico de 1856, cando estudantes, intelectuais e artesáns participaron nun encontro que buscaba cuestionar as divisións sociais da época. As pregoeiras lembraron aquel xesto simbólico no que estudantes vestidos con frac servían aos obreiros e artesáns, nun acto que pretendía romper coa estrutura clasista existente e expresar unha mensaxe de igualdade entre distintos sectores sociais.
No pregón tamén se relacionou aquel episodio histórico coa realidade actual. “Nesta sociedade tan convulsa na que vivimos, estamos aquí reunidos para lembrar aquel Banquete de Conxo. Todos xuntos, iguais e libres. Hoxe ao sentarnos á mesa lembramos que aquel banquete foi un acto de rebeldía e, por suposto, de amor”, sinalaron durante a intervención.
