O Instituto de Biodiversidade Agraria e Desenvolvemento Rural (IBADER), no campus de Lugo da Universidade de Santiago de Compostela (USC), acolleu este xoves a presentación de ‘Greenlow Pecuaria’, un proxecto promovido no marco do programa Interreg POCTEP que ten como obxectivo reducir as emisións de gases de efecto invernadoiro asociadas ás explotacións gandeiras da eurorrexión Galicia-Norte de Portugal.
A iniciativa, liderada pola USC en colaboración coa Xunta e outras entidades participantes, pretende crear un espazo de investigación e transferencia de coñecemento orientado a avanzar cara a modelos produtivos con menor impacto ambiental. O proxecto busca tamén fortalecer a cooperación entre distintos actores vinculados ao sector agropecuario.
Durante a presentación, a investigadora Cristina Castelo explicou que a iniciativa nace coa intención de “impulsar a transición verde do sector gandeiro, promovendo a sustentabilidade e a diminución de gases de efecto invernadoiro, mediante a cooperación entre centros de investigación, administracións públicas e entidades do propio sector”.
Un dos primeiros pasos previstos consistirá en determinar os niveis de emisión de metano en condicións reais de produción, co propósito de identificar posteriormente as posibilidades de redución existentes. A partir destes datos, o equipo analizará que medidas poden resultar máis eficaces e aplicables nas explotacións e avaliará a súa posible extensión ao conxunto do sector.
A conselleira do Medio Rural, María José Gómez, destacou durante o acto o papel que desempeñan a investigación e a innovación tecnolóxica no proceso de modernización da actividade agrogandeira. Segundo sinalou, o proxecto permitirá contar con ferramentas “máis fiables, máis útiles e adaptadas ás características das gandarías” deste territorio.
A responsable autonómica incidiu ademais na relación entre estas iniciativas e a capacidade do sector para reforzar aspectos como a calidade da produción, ao tempo que destacou o papel das explotacións galegas polo “compromiso” dos profesionais e polo nivel dos seus produtos.
Pola súa parte, a reitora da USC, Rosa Crujeiras, puxo o foco na necesidade de afrontar os desafíos ambientais ligados á actividade produtiva mediante fórmulas de cooperación entre institucións e o propio sector. Segundo afirmou, a sustentabilidade require diálogo e políticas públicas fundamentadas no coñecemento científico.
“A desexada e necesaria transición cara a modelos máis sustentables só será posible se universidade, administracións e sector produtivo avanzan da man, compartindo información, obxectivos e responsabilidade”, concluíu.
