O Goberno local de Santiago mantén as súas críticas á cantidade anunciada pola Xunta en concepto de capitalidade e reclama a apertura dunha negociación formal baseada nos estudos económicos elaborados sobre as necesidades da cidade. A alcaldesa, Goretti Sanmartín, asegurou que os compromisos institucionais deben materializarse mediante acordos e procesos de diálogo, e defendeu que a cidade debe percibir unha cantidade superior aos oito millóns de euros anuais.
Sanmartín sostivo que a cuestión principal non reside nun incremento puntual da achega, senón en determinar “aquilo que lle corresponde” a Santiago pola súa condición de capital de Galicia. Segundo explicou, na reunión mantida co presidente da Xunta trasladouse o compromiso de convocar unha sesión formal do Consello da Capitalidade, un órgano no que se deberían analizar os informes económicos existentes.
A rexedora lembrou que o Concello xa presentou estudos que sitúan a cifra necesaria por enriba dos oito millóns de euros e sinalou que, desde o goberno municipal, xa se asumía que o cambio non se produciría de forma inmediata. Segundo explicou, a proposta municipal pasaba por deseñar unha planificación progresiva que permitise alcanzar esa contía ao longo de varios exercicios.
Neste contexto, a alcaldesa insistiu en que a recente subida anunciada pola Xunta non responde a un proceso de negociación nin a unha análise compartida. “O problema cuestión non é agora dicir sobre o que hai ofrecéndonos algo máis, senón que é de xustiza e que nos corresponde”, afirmou.
Tamén puxo en valor o papel do executivo municipal á hora de impulsar este debate, ao considerar que a actualización da achega se produciu tras a insistencia do Concello en denunciar a insuficiencia dunha cifra que permanecía conxelada durante anos. Ao mesmo tempo, cuestionou que a Xunta non presentase informes alternativos aos estudos elaborados desde Santiago.
A alcaldesa lembrou ademais que análises realizadas anos atrás por economistas vinculados á Universidade de Santiago de Compostela xa situaban esta cantidade en arredor dos 5,5 millóns de euros, unha cifra que, segundo apuntou, quedaría hoxe superada se se aplicasen actualizacións ou se comparase coa situación doutras capitais do Estado.
Preguntada sobre a posibilidade dunha futura reunión para abordar esta cuestión, Sanmartín asegurou que o Concello mantén a súa disposición ao diálogo, aínda que recoñeceu ter “pouca esperanza” ante a falta de avances. Aínda así, incidiu en que existe un compromiso previo do presidente autonómico para analizar os estudos existentes e abordar a cuestión.
PENDENTES OS AVANCES SOBRE O MODELO DE XESIÓN DOS PARQUES
Noutra cuestión, a alcaldesa foi preguntada pola comisión encargada de definir o modelo de xestión dos parques municipais. Sobre este asunto, indicou que aínda non hai unha data fixada para a reunión, aínda que avanzou que será convocada “en breve”, unha vez rematen algúns aspectos pendentes do estudo técnico que se está ultimando.
