Santiago de Compostela incorporará o vindeiro 30 de maio unha nova cita á programación cultural das Letras Galegas coa celebración no Auditorio de Galicia de ‘As rúas do vento ceibe’, un concerto de grande formato que unirá música e poesía arredor da obra de Manuel María, xunto con textos de Rosalía de Castro e Celso Emilio Ferreiro. A presentación oficial tivo lugar este luns no Pazo de Raxoi, nun acto encabezado pola concelleira de Capital Cultural, Míriam Louzao, acompañada pola deputada de Cultura da Deputación da Coruña, Natividade González; o presidente da Fundación Manuel María, Alberte Ansede, e a presidenta da Asociación Cultural Solfa, Lucía Carreira.
A proposta toma o seu nome dunha das obras do autor chairego e nace como unha iniciativa impulsada pola Fundación Manuel María, que encargou ao compositor Xosé Carlos Seráns Olveira a creación dun repertorio musical baseado nos seus poemas. O resultado son trece pezas, once delas sobre versos de Manuel María e dúas máis inspiradas en textos de Rosalía e Celso Emilio, configurando un espectáculo que busca conectar patrimonio literario e creación musical contemporánea.
Durante a presentación, Míriam Louzao definiu o concerto como unha “mostra do mellor da nosa cultura” e chamou a persoas de todo o país a achegarse a Compostela para asistir a unha proposta que, segundo destacou, exemplifica o labor de colectivos e entidades que manteñen viva a cultura galega. A concelleira tamén informou de que os convites poderán retirarse desde o martes 19 de maneira presencial na Zona C, a través da web de Compostela Cultura e, se quedasen dispoñibles, no propio Auditorio desde unha hora antes do inicio.
Pola súa parte, Natividade González cualificou a cita como “unha homenaxe emocionante á nosa literatura, á nosa música e sobre todo á nosa identidade como país”, subliñando o diálogo artístico que se establece entre tres figuras fundamentais das letras galegas.
No escenario participará a Orquestra Sinfónica de Pontevedra, baixo a dirección de David Fiuza, coa colaboración da mezzosoprano Julia Portela Piñón e unha ampla representación coral integrada por formacións de distintos puntos de Galicia. O coro mixto reunirá ao Coro de Cámara Thalassa de Marín, o Coro do Hospital de Lugo, o Coro Liceo de Vilagarcía, o Coro Solfa de Compostela e a Sociedade Coral Polifónica de Pontevedra. A estes sumaranse voces novas procedentes do IES A Xunqueira de Pontevedra, Voces da Terra Chá de Lugo e o Peque Coro in crescendo do Conservatorio Profesional de Música de Ferrol.
A presidenta de Solfa, Lucía Carreira, agradeceu o respaldo institucional recibido para sacar adiante unha produción que, segundo indicou, supuxo “moito traballo e esforzo”, ao tempo que animou á cidadanía a participar. Nunha liña semellante, Alberte Ansede incidiu na capacidade dos clásicos galegos para seguir interpelando o presente, ao sinalar que estas voces “falan do que somos e o que queremos ser como pobo”.
