O delegado do Goberno en Galicia, Pedro Blanco, felicitou á Asociación de Xornalistas de Santiago de Compostela polos seus 80 anos de traxectoria e reivindicou o valor estratéxico do xornalismo local. Blanco participou no acto de benvida aos asistentes á LXXXV Asemblea da Federación de Asociacións de Xornalistas de España (FAPE), celebrada nas instalacións da Facultade de Xornalismo da Universidade de Santiago.
Durante a súa intervención, o delegado destacou a relevancia da prensa como un “motor dunha sociedade crítica e plena de conciencia” que traballa para acadar melloras colectivas de xeito diario. Blanco puxo o foco no papel fundamental que desenvolven os medios de comunicación de proximidade á hora de estruturar o día a día de vilas e cidades.
Nese sentido, o representante do Executivo central cualificou ás redaccións locais como as “tecidoras dos pobos e cidades”. Blanco subliñou que a súa cercanía e clara vontade de servizo público logran mellorar de xeito directo a calidade de vida dos veciños, garantindo de forma efectiva o dereito constitucional á información con independencia do lugar de residencia.
