A celebración do Día da Ascensión en Santiago converteuse tamén este xoves nun escenario de respaldo político á alcaldesa compostelá, Goretti Sanmartín, por parte da portavoz nacional do BNG, Ana Pontón, quen aproveitou a súa presenza na capital galega para defender publicamente a xestión desenvolvida polo executivo local nestes tres anos de mandato.
Pontón felicitou á rexedora polo labor realizado á fronte do Concello e contrapuxo ese traballo ao papel da oposición municipal, á que acusou de manter unha actitude “destrutiva”. “A alcaldesa leva tres anos endereitando o rumbo da cidade, a pesar dos obstáculos dunha oposición destrutiva que está a traballar en contra de Compostela”, afirmou durante a xornada festiva, nunha intervención na que presentou ao goberno local como un equipo centrado en impulsar cambios para a cidade.
A líder nacionalista incidiu en que o executivo encabezado por Sanmartín está “a traballar cada día por mellorar a cidade e impulsando proxectos que transformen Santiago”, reforzando así a mensaxe de apoio do BNG á actual dirección municipal nun contexto no que comezan a situarse no horizonte político as eleccións locais de 2027.
Pola súa banda, Goretti Sanmartín asegurou afrontar o futuro político “con moitas ganas, moita ilusión e moita enerxía”, ao tempo que puxo o foco no traballo colectivo do seu goberno. A alcaldesa quixo subliñar o papel do seu equipo, ao que definiu como un grupo que está a desenvolver unha tarefa intensa, centrada en dialogar e en establecer prioridades para a cidade.
En relación coa súa posible candidatura ás próximas eleccións municipais, Sanmartín evitou dar por feita a súa continuidade e apelou aos mecanismos orgánicos da formación nacionalista. A rexedora lembrou que “os procedementos internos hai que respectalos” e sinalou que serán a asemblea local e posteriormente o Consello Nacional os órganos encargados de decidir quen encabezará finalmente a candidatura do BNG ao Concello de Santiago en 2027.
