O secretario xeral do PSdeG defendeu que a capital galega viviu os seus "mellores momentos" baixo gobernos socialistas.

O secretario xeral do PSdeG, José Ramón Gómez Besteiro, reivindicou este xoves que Santiago de Compostela “merece máis” e anunciou que o partido activará no segundo semestre deste ano o proceso para elixir a candidatura de face ás eleccións municipais de 2027. En declaracións aos medios durante a festividade da Ascensión, Besteiro defendeu que a capital galega viviu os seus “mellores momentos” baixo gobernos socialistas, destacando o protagonismo económico e cultural da cidade, así como o seu papel como “exemplo” na prestación de servizos públicos.

“O que nos obsesiona é devolverlle a Compostela o seu peso e a súa forza”, aseverou o líder dos socialistas galegos. Ao ser preguntado polos posibles candidatos á alcaldía de Santiago nos próximos comicios locais, Besteiro evitou adiantar nomes, subliñando que serán os socialistas composteláns quen decidan quen encabeza a lista. Neste sentido, insistiu en que, no momento actual, “o importante non é o nome, senón o proxecto”. O dirixente socialista situou na segunda metade do ano o inicio dos mecanismos internos para a elección de candidatos.