O Concello de Santiago xa expediu arredor dun cento de certificados de vulnerabilidade, un documento clave dentro do proceso extraordinario de regularización de persoas migrantes, segundo avanzou este martes a tenente de alcaldesa, María Rozas, durante a rolda de prensa posterior á Xunta de Goberno.
A responsable municipal sinalou que o procedemento na capital galega está a desenvolverse de maneira “moi acertada e ordenada”, despois de que a administración local decidise reforzar a unidade encargada de tramitar estes certificados para responder á demanda existente e garantir o cumprimento dos prazos establecidos pola normativa.
Rozas explicou que un dos principais retos detectados nas primeiras fases foi o descoñecemento entre a poboación afectada sobre a necesidade deste documento dentro do proceso de regularización. Por este motivo, o Concello puxo o foco na difusión de información e no acompañamento administrativo para facilitar o acceso ao procedemento.
A tenente de alcaldesa destacou tamén a coordinación entre diferentes áreas municipais para atender esta medida, subliñando a “implicación moi importante” de varios departamentos na xestión dunha ferramenta que considera esencial para dar resposta á situación de moitas persoas migrantes.
Desde o goberno local insisten en que esta regularización era unha demanda necesaria e largamente agardada. “Cremos que esta regularización era moi necesaria, moi importante, chega tarde, pero o importante é que chega”, afirmou Rozas.
Segundo as estimacións manexadas polo executivo compostelán, esta medida podería beneficiar a unhas 500 persoas na comarca de Santiago, unha cifra que sitúa a cidade como un dos puntos galegos con maior impacto deste proceso.
