O presidente da Xunta, Alfonso Rueda, recibiu na mañá deste luns aos xogadores e ao equipo directivo do Monbus Obradoiro despois de que o conxunto compostelán confirmase o pasado venres o seu ascenso á Liga ACB, recuperando así a presenza na máxima categoría do baloncesto español.
Durante a recepción, na que estivo acompañado polo conselleiro de Presidencia, Xustiza e Deportes, Diego Calvo, o titular do Executivo galego trasladou os seus parabéns ao club polo conseguido ao longo da tempada e polo éxito deportivo que permite ao Obradoiro regresar á elite.
Segundo informou a Xunta nun comunicado, Rueda felicitou ao equipo polo traballo realizado e expresou tamén os seus bos desexos para esta nova etapa na ACB, confiando en que a súa volta á competición estea chea de éxitos.
No transcurso do encontro, o presidente galego reivindicou o papel do deporte galego tamén no ámbito do baloncesto, ao asegurar que “en básquet tamén somos Galicia Calidade”. Ademais, mostrou o seu desexo de que a próxima tempada poida contar cunha representación galega destacada na máxima categoría, apostando por unha presenza “especialmente cunha presenza galega moi potente”.
