A SD Compostela certificou este domingo a segunda praza do seu grupo e terá que pasar polo playoff de ascenso a Segunda RFEF tras non poder aproveitar o tropezoo que necesitaba do líder. O cadro compostelán fixo o seu traballo en Viveiro cunha vitoria por 0-1, pero en A Lomba, o Vilagarcía remontou o seu partido e asegurou o primeiro posto e o ascenso directo.
Os composteláns saltaron ao campo de Cantarrana coa consigna clara de sumar os tres puntos e agardar noticias favorables doutro campo. Dende o inicio, o equipo amosou un dominio territorial claro, co balón nos seus pés e buscando con insistencia o marco rival.
O premio ao esforzo chegou pasado o cuarto de hora mediante unha acción a balón parado. Cañi botou unha falta ao corazón da área e Damián Noya anticipouse á defensa local e ao gardameta para rematar de cabeza e inaugurar o marcador. Con ese 0-1 no electrónico, o Compos non se conformou e seguiu a preguntar na portaría contraria sen descoidar a súa propia.
Antes do descanso, Armental estreou o poste tras unha acción individual, e Parapar non puido superar a Ayoub, que despexou con apuros unha falta botada dende a frontal do área. A pesar das oportunidades, o marcador non se moveu e os dous equipos marcharon aos vestiarios co resultado mínimo.
Na segunda metade, o guión non variou demasiado. O Compos seguiu a levar o peso do partido e buscou con maior intensidade o segundo tanto coa entrada dos suplentes. Damián Noya volveu estar a piques de marcar, mais o balón bateu no pau nun remate de córner, e Goris, nunha segunda xogada tras un rexeite do porteiro local, mandou o esférico ao largueiro. A portería de Cantarrana resistiu ata o final.
O 0-1 definitivo foi resultado suficiente para gañar en Viveiro, pero non para alcanzar o liderato, xa que o Vilagarcía remontou no seu estadio e logrou o ascenso directo. O Compos, polo tanto, quedou segundo clasificado e terá que disputar a fase de ascenso.
O playoff arrincará o próximo fin de semana e o primeiro rival dos composteláns será o Racing Villalbés, nun enfrontamento que decidirá quen continúa na loita polo salto de categoría.
