O Concello de Santiago aprobou este mércores de forma definitiva o Orzamento Xeral para 2026, despois de que o Pleno extraordinario celebrado no Pazo de Raxoi ás 13:00 dese luz verde ao rexeitamento ou inadmisión das alegacións presentadas durante o período de exposición pública. As contas saíron adiante cos votos favorables de BNG, Compostela Aberta e das concelleiras e concelleiro non adscritos, mentres que PP e PSOE optaron pola abstención.
O documento económico ascende a 148.532.471,20 euros, o que representa un incremento do 1,64 % respecto ao exercicio anterior. Ademais, o orzamento consolidado co conxunto das entidades do sector público municipal sitúase en preto de 152 millóns de euros, configurando así a principal ferramenta financeira do goberno local para o próximo ano.
Durante a sesión plenaria, o concelleiro de Facenda, Manuel César Vila, baseou a defensa da proposta nos informes emitidos polos servizos xurídicos e técnicos municipais, en particular polos departamentos de Persoal e de Xestión Orzamentaria e Contabilidade. O edil explicou que unha das alegacións inadmitidas fora presentada por un funcionario municipal que reclamaba un nivel laboral superior, unha petición que, segundo indicou, non se corresponde co ámbito do procedemento orzamentario nin co marco competencial do Concello, ademais de existir unha sentenza favorable á Administración local neste mesmo asunto.
DEMANDAS VECIÑAIS DE SAMOS E GRUPOS COMPOSTELA
As outras dúas alegacións partiron da Asociación Sandra Prego Rial, centradas en actuacións de mellora urbana e de seguridade en zonas como a rúa Samos, os Grupos Compostela e Cardeal Quiroga. Entre as peticións figuraban a reurbanización do viario, melloras de accesibilidade, mantemento de infraestruturas e a reposición da iluminación das instalacións deportivas da rúa Samos.
Segundo explicou o responsable de Facenda, estas demandas non prosperaron por non existir base legal para obrigar á súa inclusión específica no documento orzamentario, aínda que o executivo local comprometeuse a “tentar levar adiante as reclamacións coas partidas que xa están no orzamento establecidas”.
Coa aprobación definitiva, o goberno municipal culmina a tramitación das contas para 2026, que marcarán a planificación económica de Santiago nun contexto de continuidade das políticas municipais e de xestión dos recursos públicos para o próximo exercicio.
