O Concello de Santiago acordou solicitar formalmente á Xunta de Galicia un incremento da achega autonómica destinada ao Servizo de Axuda no Fogar (SAF), ao considerar que o financiamento pactado entre o Goberno galego e a Federación Galega de Municipios e Provincias (Fegamp) continúa sen cubrir o custo efectivo desta prestación esencial no municipio.
A decisión foi adoptada na xunta de goberno local e inclúe, ademais, a reserva expresa do dereito do Concello a reclamar “por todas as vías administrativas ou xurisdicionais que procedan” o cumprimento íntegro das obrigas de financiamento que, segundo sostén o executivo compostelán, lle corresponden á administración autonómica.
A concelleira de Dereitos e Servizos Sociais, María Rozas, argumentou que tanto o Estatuto de Autonomía de Galiciacomo a lexislación autonómica en materia de servizos sociais atribúen á Xunta a competencia exclusiva neste ámbito. Nesa liña, lembrou que cando a Administración galega delega competencias nas entidades locais debe facelo acompañando esa atribución dos recursos económicos, materiais e persoais necesarios para o seu desenvolvemento.
Segundo defendeu, esta obriga tradúcese en que a Xunta debería asumir de forma íntegra o custo do SAF, descontando unicamente o copagamento realizado polas persoas usuarias. Desde o goberno municipal consideran que a subida da achega ata os 16 euros por hora non responde ao gasto real que afronta Santiago, onde o custo do servizo se sitúa arredor dos 24 euros por hora.
Rozas sostivo que esta diferenza continúa obrigando ao Concello a asumir unha parte importante do financiamento dun servizo que cualificou de esencial para a atención social, especialmente no acompañamento a persoas maiores ou dependentes. Por iso, reclamou ao Executivo presidido por Alfonso Rueda que cumpra coa normativa vixente e garanta unha cobertura económica axustada ao custo real da prestación.
