A SD Compostela continúa con vida na loita polo ascenso tras superar este domingo ao Estradense por 2-1 no estadio Vero Boquete de San Lázaro, un resultado que lle permite chegar á derradeira xornada de liga con opcións de seguir pelexando polo seu obxectivo.
O equipo santiagués afrontaba o choque coa obriga de sumar os tres puntos para non quedar descolgado da carreira polo ascenso e conseguiu sacar adiante un partido esixente fronte a un Estradense sen presión clasificatoria, pero competitivo durante boa parte do encontro.
A primeira metade estivo marcada pola igualdade e pola ausencia de ocasións claras durante boa parte do tempo inicial. O xogo interrompeuse durante máis de dez minutos pola grave lesión de Landeira, unha acción que condicionou o ritmo do encontro. Tras a reanudación, o Compos deu un paso adiante e atopou premio no minuto 36, cando Charly aproveitou unha xogada embarullada dentro da área para bater a Pablo Brea cun disparo raso e adiantar aos locais.
A vantaxe, porén, durou pouco. O Estradense respondeu apenas cinco minutos despois cun tanto de Edu, que definiu cun lanzamento cruzado imposible para Álex Cobo, devolvendo a igualdade ao marcador antes do descanso.
O Compos rozou o segundo gol de inmediato, cunha acción na que Charly estrelou o balón no longueiro tras centro de Armental, pero o 1-1 mantívose ao remate dos primeiros 45 minutos.
Na segunda parte, o cadro compostelán incrementou a intensidade e asumiu o protagonismo ofensivo. Samu, Maceira e Parapar protagonizaron varias chegadas perigosas, mentres a ansiedade aumentaba nas bancadas ante a falta de acerto.
A insistencia local atopou finalmente recompensa no minuto 82. Nun balón longo prolongado por Maceira, Parapar gañoulle a acción á defensa, superou ao porteiro e marcou a porta baleira para desatar a celebración en San Lázaro e asinar o definitivo 2-1.
Nos últimos minutos, o Compostela soubo defender a súa renda con orde e asegurou unha vitoria fundamental para manter abertas as súas opcións de ascenso. O equipo xogará así a súa última baza na xornada final, na que seguirá dependendo do seu resultado para intentar prolongar a pelexa polo salto de categoría.
