A perda das bolsas Ramón e Cajal por parte da Universidade de Santiago de Compostela (USC) supón, segundo o conselleiro de Educación, Ciencia, Universidades e FP, Román Rodríguez, un “mazazo” para o sistema galego de I+D+i, ao considerar que deixa fóra investigadores de alto nivel por mor dun erro na tramitación administrativa das solicitudes.
Durante un acto celebrado este xoves, o titular de Educación cualificou a situación como un “golpe moi duro” para Galicia, ao lembrar que estes contratos postdoutorais representan unha das principais vías de captación de talento científico. Rodríguez advertiu de que a consecuencia desta situación é a perda de profesionais “tremendamente competitivos” con capacidade para fortalecer o tecido investigador e a futura carreira académica.
“É un mazazo, sobre todo se se ve que é por unha neglixencia na tramitación administrativa”, afirmou o conselleiro, quen incidiu en que destes programas xorden proxectos científicos e tamén futuros docentes universitarios. Neste contexto, apelou á USC a “negociar o máximo posible” co Ministerio de Ciencia, Innovación e Universidades para tentar reconducir a situación.
Rodríguez expresou o respaldo da Xunta á institución académica compostelá para buscar unha solución, aínda que subliñou que a capacidade de flexibilización dependerá en última instancia do Goberno central. “O ministerio pode recoñecer unha certa flexibilidade, unha situación excepcional ou un marco no cal se pode recuperar algo”, sinalou.
O conselleiro lembrou que Galicia estaba a rexistrar bos resultados na captación destes investigadores e destacou que a USC situárase entre as universidades con mellores cifras do Estado neste ámbito. Ao mesmo tempo, evitou entrar nas dinámicas internas da universidade, apelando á súa autonomía, pero remarcou que tamén debe asumir responsabilidades cando se producen erros e traballar para emendalos.
CRÍTICAS Á FOLGA EDUCATIVA
Na mesma comparecencia, Román Rodríguez tamén se pronunciou sobre a folga no ensino, vinculando a convocatoria coa CIG e coa súa contorna política e ideolóxica. O conselleiro sostivo que existe unha estratexia de conflito impulsada por organizacións vinculadas ao nacionalismo, asegurando que responde a unha orientación política definida.
