A estación de Santiago de Compostela verá alterada parte da súa operativa ferroviaria a partir do vindeiro 5 de xuño como consecuencia da nova fase das obras que Adif executa na terminal da Coruña. Segundo informou Renfe, habilitarase un plan alternativo de transporte que incluirá transbordos por estrada entre ambas cidades en distintos servizos ferroviarios, cun impacto que se prolongará ata o 10 de xullo.
Nunha primeira fase, entre o 5 e o 25 de xuño, os trens rexionais da liña A Coruña-Vigo Guixar substituirán por autobús o tramo entre A Coruña e Santiago de Compostela, en ambos sentidos, debido ás limitacións operativas na estación coruñesa. Esta medida afectará ás conexións habituais con saída ou chegada en Santiago dentro deste corredor atlántico.
Ademais, o 25 de xuño, o último servizo do día entre Madrid e A Coruña, correspondente ao Avlo 4597, tamén realizará por estrada o percorrido entre Santiago e A Coruña, o que repercutirá nas persoas viaxeiras con destino final na cidade herculina.
Na segunda fase, prevista entre o 26 de xuño e o 10 de xullo, a interrupción total da circulación ferroviaria na estación da Coruña provocará unha ampliación das modificacións. Durante ese período, Renfe organizará transporte por estrada entre Santiago e A Coruña para servizos rexionais, Media Distancia, Avant e Alta Velocidade, incluíndo así trens de longa distancia con paso pola capital galega.
A compañía advirte de que estes cambios poden supoñer un incremento nos tempos de viaxe, así como variacións nos horarios de saída e chegada, polo que recomenda revisar con antelación a información actualizada antes de desprazarse. Renfe tamén sinala que permitirá cambios ou anulacións sen custo para as persoas usuarias que prefiran reorganizar os seus desprazamentos durante o período das obras. Os novos horarios e condicións estarán dispoñibles nos canais habituais de venda e información da operadora.
