A alcaldesa de Santiago, Goretti Sanmartín, defendeu o impulso que se dá desde o Concello ao plan de desenvolvemento turístico para a cidade e os pasos para captar máis rutas aéreas. Con todo, a rexedora sinalou directamente á Xunta, á que afeou “non coller o temón” para impulsar unha proposta aeroportuaria conxunta para o país. En declaracións aos medios, Sanmartín esgrimiu que o Consistorio está a levar a iniciativa e “tentando resolver en solitario a posibilidade de facer promoción para poder ter máis rutas” desde o aeroporto da capital galega.
Fronte ás críticas da oposición, a alcaldesa incidiu en que o goberno que dirixe está a ser capaz de captar máis conexións e de desenvolver o plan de sustentabilidade turística de forma “absolutamente eficiente”. “O que nos falta neste caso é esa colaboración por parte da Xunta que non acaba de arrincar e de entender que ten que facer unha política conxunta para todo o país“, resolveu a rexedora durante un acto con escolares sobre o comercio tradicional no centro histórico.
NEGOCIACIÓNS COAS COMPAÑÍAS AÉREAS
Precisamente, a concelleira de Turismo, Míriam Louzao, e a xerente de Turismo de Santiago, Flavia Ramil, participan estes días 28 e 29 de abril nas ‘V Xornadas de conectividade aérea’, organizadas por Turespaña e Aena en Reus. O evento ten como obxectivo fomentar o desenvolvemento da conectividade aérea internacional e coordinar mensaxes de forma unificada entre os destinos turísticos do Estado.
Louzao e Ramil mantiveron reunións con diferentes compañías aéreas coa intención de intensificar relacións e estudar novas posibilidades, tanto con empresas que xa operan no Rosalía de Castro como con potenciais operadoras. Estas xestións buscan mellorar a conectividade do aeroporto compostelán de cara ao vindeiro Ano Santo, analizando as previsións a curto e medio prazo do mercado aeronáutico mediante mesas de debate e encontros profesionais.
