A Unión de Pequenos Agricultores e Gandeiros (UPA) pediu un ano máis “a complicidade do consumidor” repartindo máis de 2.000 tarrinas de fresas de Huelva na Praza do Obradoiro, en Santiago. En declaracións aos xornalistas, o secretario xeral de Unións Agrarias (UU.AA.), Roberto García, subliñou que este acto simbólico celébrase nun momento “especialmente significativo”, polos acordos que está pechando a Unión Europea con Mercosur, Australia e Estados Unidos.
“O que viñemos poñer de manifesto desde o sector produtor é que precisamos máis que nunca a complicidade do consumidor. Complicidade significa que, á hora de elixir o produto que compra, aposte por consumir produtos de orixe España, os nosos”, destacou.
Nese senso, fixo esta petición “non por sentimentalismo, senón porque é apoiar a economía rural, o papel que teñen os agricultores e gandeiros na xestión do territorio e do medio rural”. Comprar produto propio, insistiu García, “é apostar por un modo de producir sostible, con garantía e calidade, e apostar por evitar os grandes desprazamentos de produtos doutras zonas, que contribúen á contaminación”.
“RENDAS BAIXAS”
Roberto García destacou que “os agricultores e gandeiros xestionan cada vez menos territorio e con rendas máis baixas” e exemplificou a problemática coa situación de que “calquera tarrina de fresas, calquera quilo de patacas, calquera quilo de cebolas, pálase ao produtor e cando chega ao consumidor multiplicouse por máis do 400%”.
Contrastou isto coa lei da cadea, “que di que a formación dos prezos ten que facerse de abaixo arriba”. Así, fronte ao “poder das grandes cadeas” que “esfíngue esa formación de prezos”, subliñou que o que piden non é “que se venda máis caro, senón que ese prezo se reparta mellor”. “E que, á hora de elixir, o consumidor escolla produto de calidade, de orixe España, con sistemas sostibles”, reiterou.
“SAUDABLE E SOSTIBLE”
Xunto a el, o secretario xeral da UPA Huelva, Manuel Piedra, lembrou os dous meses de borrascas a comezos de ano, que afectaron á produción. Pedindo tamén ao consumidor que opte por produto español como a fresa de Huelva, “saudable e sostible”, avisou da diferenza entre o prezo das tarrinas que repartían este mércores e o que perceben os produtores por elas. Neste contexto denunciou que “alguén está meténdolle a man no peto aos consumidores”.
