A catedrática de Nutrición e Bromatoloxía Raquel Sendón García foi elixida nova decana da Facultade de Farmacia da Universidade de Santiago de Compostela (USC) para os próximos seis anos. Foi elixida con 42 votos fronte aos 36 do outro candidato, o profesor Eddy Sotelo Pérez, máis catro papeletas en branco. No seu equipo contará con Paz García Martínez como vicedecana de Organización Académica e Estudantes; Trinidad de Miguel Bouzas como vicedecana de Calidade; e Matilde Casas Parada como secretaria académica.
Sendón afronta esta nova etapa co “compromiso de impulsar unha fase orientada ao avance continuo da calidade académica, á atención ás necesidades da comunidade do centro e á adaptación aos novos desafíos do ámbito universitario e profesional”. Apostará por unha escoita activa da comunidade universitaria, o reforzo da calidade docente e a actualización do plan de estudos do Grao en Farmacia como eixos do seu decanato, nunha formación de “excelencia”. Tamén promoverá prácticas externas optativas e abordará a planificación do traslado ao futuro edificio docente da Facultade de Farmacia.
TRAXECTORIA
Raquel Sendón García ocupaba desde 2022 na Facultade o cargo de vicedecana de Calidade e Relacións Exteriores e era membro nato nas comisións académicas das titulacións adscritas, ademais do Grao en Farmacia e do Máster Interuniversitario en Biofabricación e do Máster en Investigación e Desenvolvemento de Medicamentos. Membro do grupo de investigación FoodChemPack, Sendón centrou a súa traxectoria investigadora e de transferencia nos materiais en contacto co alimento, concretamente na migración de contaminantes, pero tamén na liña de investigación sobre materiais activos e biodegradables que inclúe a valorización de subprodutos agroalimentarios.
Parte desta traxectoria desenvolveuna nunha estancia no Centro Nacional de Alimentación (Aesan). Participou como investigadora principal en nove proxectos competitivos —seis autonómicos, un estatal e dous de ámbito europeo— e colaborou como investigadora noutros 18, ademais de liderar ou participar na formalización de preto de 30 contratos con empresas. No ámbito da transferencia é autora dunha patente e participou na creación dunha spin-off da USC.
Cun índice h en Scopus de 31 e en Google Scholar de 35, a súa produción científica é extensa: cinco libros, oito capítulos de libro e 97 publicacións en revistas do WOS con índice de impacto, 63 delas en Q1 e 19 en Q2, ademais de 22 en D1. Dirixiu, ademais, cinco teses doutorais e máis de 40 traballos fin de mestrado e de grao. En canto á traxectoria docente, a nova decana impartiu docencia durante 16 anos en Farmacia. Na actualidade coordina as prácticas externas curriculares optativas e foi coordinadora do 5.º curso do Grao en Farmacia. Desde 2022-2023 é membro da comisión académica do Máster en Innovación en Nutrición, Seguridade e Tecnoloxía Alimentaria.
