A Confederación Española de Policía (CEP) denunciou publicamente o que considera unha situación de “abandono” por parte do Ministerio do Interior tras o incendio rexistrado hai máis de dous meses na comisaría de Santiago de Compostela, sen que, segundo aseguran, se adoptasen medidas suficientes para resolver as consecuencias do suceso.
Segundo trasladan desde o sindicato, os axentes continúan desenvolvendo o seu labor en condicións que cualifican de “situación terceiromundista”, ao estar distribuídos en espazos provisionais que, afirman, non reúnen os requisitos básicos. Neste sentido, sinalan que conviven “hacinados en oficinas provisionais que non pasarían ningunha inspección de prevención de riscos laborais”, o que, ao seu xuízo, afecta tanto ao desempeño do servizo como á seguridade do persoal.
A CEP indica ademais que a infraestrutura actual se atopa nun estado que dificulta a súa recuperación a curto prazo. Así, consideran que a comisaría é “irrecuperable sen unha obra de calado”, unha intervención que, segundo apuntan, podería prolongarse durante meses ou mesmo anos.
Ante esta situación, o sindicato policial propón como alternativa a construción dunha nova comisaría na cidade. Reclaman que se sitúe nunha “localización idónea” e que permita “cubrir as carencias e limitacións” detectadas no edificio actual, co obxectivo de garantir unhas condicións adecuadas para o traballo policial e a atención á cidadanía en Santiago de Compostela.
