Decenas de veciños participaron este sábado na andaina reivindicativa convocada pola Plataforma STOP Planta de Residuos Cacheiras Aldeas Limpas, que partiu desde o parque infantil da Torre para percorrer as pistas que rodean o terreo onde se pretende instalar unha planta de tratamento de residuos da construción. Tal e como trasladou a plataforma nunha nota de prensa, durante o percorrido realizáronse paradas nas entradas aos terreos de Escavacións Midón e nas vivendas máis próximas, onde se puideron ver pancartas de oposición á instalación da planta colgadas en fachadas e valados.
“O principal obxectivo foi evidenciar sobre o terreo as dimensións e características das pistas da contorna, estreitas e de difícil tránsito, nas que non é posible o paso simultáneo de dous vehículos, e moito menos se un deles é un camión de grandes dimensións”, explicaron desde a directiva da plataforma. Así, sinalaron que os veciños advertiron do “grave risco” para a seguridade viaria que suporía este incremento do tráfico pesado, así como da “deterioración acelerada” que sufrirían estas vías, que constitúen os únicos accesos ás vivendas da zona.
Durante a mobilización, a plataforma puxo tamén o foco no impacto ambiental e na saúde das persoas, facendo fincapé no po en suspensión que xeraría a actividade da planta e no ruído constante das máquinas e dos propios camións durante o seu tránsito. Por todo iso, reiteraron a súa petición ás distintas administracións para que se despracen ao lugar e “coñezan de primeira man a realidade da contorna e os prexuízos que esta instalación causaría ás vidas dos veciños”.
Así mesmo, informaron de que a Subdirección Xeral de Residuos e Economía Circular acaba de convocar a plataforma a unha reunión que terá lugar o vindeiro venres 24 de abril. A ese encontro acudirán, segundo explicaron, “coa vontade de trasladar estas preocupacións e coa esperanza de que a administración autonómica revise o proxecto e denegue a autorización”.
