A oposición veciñal á localización en Cacherias, no municipio coruñés de Teo, dunha planta de tratamento de residuos da construción nunha zona con vivendas moi próximas chegará ao Parlamento de Galicia a través dunha batería de iniciativas impulsadas polo BNG, que reclama á Xunta “reiniciar” o proceso de avaliación de impacto ambiental.
Mediante unha proposición non de lei e preguntas tanto en comisión como no pleno da Cámara galega, o BNG incluirá en debate parlamentario a oposición veciñal a un proxecto industrial que xerou protestas, a última delas este sábado, cando a Plataforma Stop Planta de Residuos Cacheiras-Aldeas Limpas convocou unha camiñada reivindicativa.
O BNG expresou o seu respaldo á acción de protesta ao redor dos terreos nos que escavacións Midón quere situar a planta de residuos da construción. Os manifestantes sairán ás 10.00 horas desde o parque infantil da Torre, unha das aldeas máis próximas, xunto con Feros.
PROPOSTAS
Ademais de apostar por volver facer a avaliación ambiental do proxecto, o BNG tamén lle reclama á Xunta que se reúna “de maneira inmediata” con representantes da Plataforma Stop Planta de Residuos Cacheiras-Aldeas Limpas, que xa solicitaron unha reunión coa Consellería de Medio Ambiente. A deputada nacionalista Saleta Chao subliña que a localización da planta de Midón “próxima ás casas e a un centro educativo” preocupa aos veciños, que “teñen dereito a que a Xunta escoite as súas demandas, dialogue e garanta unha localización que non provoque prexuízo para a súa vida”.
Pola súa banda, o portavoz do BNG en Teo, Eloi Devesa, tacha de “auténtico despropósito” o proxecto, xa que “provocaría ruído constante, po en suspensión e tráfico pesado por pistas inadecuadas”. “Unha condena para o rural, que se está vendo ameazado diante da parálise do goberno municipal, que nin informou á veciñanza nin presentou alegacións nin se acudiu no expediente, é dicir, abandonaron aos veciños”, expón en referencia ao concello gobernado con maioría absoluta polo PP.
