O Multiusos Fontes do Sar de Santiago de Compostela acolleu na noite deste sábado a estrea ao vivo de Rapants Club, o novo traballo da banda muradá The Rapants, nun concerto que reuniu a case 6.000 persoas.
A actuación serviu para presentar por primeira vez en directo as 12 cancións do cuarto LP do grupo, nun evento que se desenvolveu como unha celebración arredor da música galega actual. O acceso ao recinto estivo acompañado de varias propostas dirixidas ao público, entre elas unha actuación sorpresa dunha formación de mariachis e a entrega do carné de socia/o de Rapants Club.
Antes do inicio do concerto principal, a banda compostelá Ulex foi a encargada de abrir a noite, contribuíndo a crear ambiente coa súa actuación.
Ás 21:05, os integrantes de The Rapants —Mati, Samu, Xanma e Xaquín— subiron ao escenario para dar comezo ao espectáculo. Ao longo da velada, a banda estivo acompañada por diversos artistas convidados, entre eles Galician Army, Grande Amore, Sara Faro de Fillas de Cassandra, Antía Ameixeiras de Caamaño & Ameixeiras e 9Louro.
Ao evento asistiron tamén a alcaldesa de Santiago, Goretti Sanmartín, e a concelleira de Deportes e Festas, Pilar Lueiro, que estiveron presentes nesta cita musical celebrada nun dos principais recintos da cidade.
