A Xunta de Galicia comunicou este luns que o Pazo de Fonseca acollerá unha exposición de acceso gratuíto entre o 2 e o 4 de abril sobre a camelia denominada ‘Camelia, flor de Galicia’. Unha iniciativa que constitúe un “reforzo” da oferta cultural compostelá durante Semana Santa.
Conforme ao comunicado do Executivo autonómico, a mostra combinará tradición botánica e elementos representativos do traxe galego a través da representación de máis de 200 variedades da flor en cuestión.
Así mesmo, adiantaron que 25 coleccionistas e entidades participarán nunha actividade que tamén disporá de ferramentas audiovisuais co obxectivo de “enriquecer a experiencia do visitante”.
Organizada en colaboración coa Universidade de Santiago de Compostela (USC) e a Sociedade Española da Camelia, o director de Turismo de Galicia, Xosé Merelles, destacou o potencial da iniciativa no “enriquecemento da experiencia dos visitantes” de Santiago.
Respecto da camelia, lembrou que a Ruta da camelia forma parte dos itinerarios dos Trens Turísticos da comunidade que oferta Renfe e que discorren por 19 “espazos singulares entre xardíns e recursos asociados da comunidade”.
Con todo, Merelles enxalzou a relevancia de iniciativas de índole similar tras a “desaceleración da chegada de visitantes” á capital galega, erguéndose a exposición da camelia como un elemento que converte a Santiago en “un destino atractivo fóra de tempada”.
