O BNG de Teo levou a cabo mobilizacións na rúa para visibilizar a situación da atención sanitaria no concello, marcada, segundo denuncian, por incidencias reiteradas e unha falta de planificación na cobertura de profesionais nos centros de saúde.
Dende a organización sinalan que esta situación está a provocar un incremento das listas de agarda e obrigando a parte da veciñanza a desprazarse a outros municipios para recibir asistencia médica. Esta circunstancia, apuntan, ten unha especial incidencia en persoas con doenzas crónicas e na poboación infantil, ao dificultar o acceso regular á sanidade pública.
O BNG tamén pon o foco na carencia de determinados servizos sanitarios no propio concello. Na actualidade, segundo indican, os centros de saúde de Teo non contan con profesionais en áreas como farmacia, odontoloxía, fisioterapia, saúde mental ou radioloxía, o que limita a capacidade de atención integral.
Ademais, a formación critica a tardanza na execución do novo centro de saúde, unha infraestrutura que consideran necesaria para dar resposta ás necesidades asistenciais da poboación. A este respecto, subliñan que a demora na súa construción está a agravar as deficiencias actuais do sistema sanitario local.
