A 17º edición das ‘Leccións Xacobeas Internacionais’ da USC celebraranse do 20 ao 23 de xullo baixo o título ‘Patrimonio e voces do Camiño de Santiago’.
Tal e como trasladou a USC nunha nota de prensa, as xornadas, que contarán con expertos nacionais e internacionais que compartirán o seu coñecemento, converterán a cidade no “epicentro do debate, a investigación e o intercambio de ideas sobre as peregrinacións e o Camiño Xacobeo”.
Entre os relatores atópanse expertos internacionais como o catedrático de Historia do Cristianismo e da Igrexa da Universidade de Turín e Presidente da Asociación Internacional para a Investigación dos Santuarios, Paolo Cozzo; ou a profesora titular de Historia na Universidade Federal de Jataí e na Pontifícia Universidade Católica de Goiás, coordinadora da rede internacional de investigación RELICARIO sobre Arte e Historia das Reliquias Ibéricas Cristiás, Renata Cristina de Sousa.
Ademais, como novidade, os asistentes ás xornadas disporán de tradución simultánea a través da aplicación Wordly AI Translation and Captions, que facilitará o seguimento dos relatorios e a súa tradución a calquera idioma.
Con respecto á programación, inclúe a “peregrinación” polas rúas de Santiago de Compostela da man do divulgador Miguel Anxo Cajigal; a visita ao novo Museo Diocesano de Santiago de Compostela, inaugurado en xaneiro deste ano, a cargo de guías especializadas do propio centro.
Tamén, comprende a presentación do proxecto Portomarín Virtual, gañador do premio Synergy Grant da Unión Europea para formar parte do 3DBigDateSpace Project; a camiñada polo tramo Rubiães-Tui do Camiño Portugués, guiados por Rafael Sánchez; e a visita guiada á Catedral de Tui e á cidade, con motivo do 800 aniversario da sé, da man do profesor José Ramón Fernández, entre outras actividades.
As xornadas estarán dirixidas polo catedrático de Historia da arte pola Universidade de Santiago de Compostela e fundador e director das Leccións Xacobeas Internacionais, Miguel Taín Guzmán, e o profesor titular da Universidade de Santiago de Compostela e director da Cátedra Unesco sobre Migracións da Universidade de Santiago, Domingo González Lopo.
