Os servizos de inspección da Xunta reuníronse o luns co claustro de profesores do IES O Milladoiro, en Ames, e alcanzaron un acordo para a renovación da dirección, despois de que a anterior fose cesada polos problemas de convivencia no centro.
Así, espérase que esta semana comece o traballo dun equipo que servirá como ‘ponte’ ata o mes de xullo, para que despois se poida cubrir o equipo a través do proceso ordinario –é dicir, o concurso de dirección– e que teña plenas funcións de face ao próximo curso. Segundo fontes coñecedoras da situación consultadas por Europa Press, na tarde do luns producíronse reunións do inspector co claustro de profesores e co consello escolar do IES para alcanzar un acordo ao redor dos seguintes pasos a dar.
Xa o luns pola mañá, o conselleiro de Educación, Román Rodríguez, confiaba en que a dirección ‘ponte’ poida achegar solucións. Segundo confirmaba el mesmo, no centro producíronse cuestións de convivencia interna, mal comportamento dalgúns alumnos, “problemas entre alumnos”, ademais de “desaxustes internos” no claustro.
O domingo transcendía que a actual dirección do IES O Milladoiro fora cesado tras unha auditoria realizada ao centro educativo, tras meses de mobilizacións nas que participaron profesores, sindicatos, pais e alumnos polos problemas de convivencia.
