A Policía Autonómica detivo a unha persoa en Santiago por un suposto delito de malos tratos continuados de animais, tras localizar, no marco da investigación dun incendio, unha gaiola cun can morto e outro en estado crítico.
Segundo informaron fontes da Xunta, o achado dos animais produciuse cando se investigaba un lume nunha leira na parroquia de Bando o mes pasado. Os axentes atoparon aos cans e comprobaron que os danos que presentaban non eran resultado das chamas, senón da falta de atención.
O can que estaba vivo foi trasladado ao refuxio de animais de Bando para o seu tratamento veterinario, e as investigacións permitiron constatar incumprimentos graves por parte da persoa investigada durante anos. Así, os animais estaban permanentemente enxaulados, sen acceso a alimento nin auga, en instalacións cunha evidente falta de limpeza e hixiene, sen atención nin vixilancia adecuadas. Ademais, o can morto carecía do preceptivo microchip identificador.
As actuacións e dilixencias realizadas foron postas en coñecemento do xulgado de garda de Santiago de Compostela.
