A alcaldesa de Teo, Lucía Calvo de la Uz, solicitou un reforzo dos efectivos da Garda Civil para a comarca ante os roubos rexistrados nas últimas semanas en distintos puntos do territorio. A rexedora trasladou esta demanda tras manter contactos cos responsables dos corpos de seguridade que operan no municipio.
Neste contexto, este martes tivo lugar un novo encontro entre a alcaldesa, o comandante do posto principal da Garda Civil no Milladoiro, Jesús Tobar, e o xefe da Policía Local de Teo, Manuel Parga. A reunión serviu para facer seguimento dos traballos de vixilancia e control que se están a desenvolver no concello e para analizar a situación actual en materia de seguridade.
Segundo indicou o goberno local, a alcaldesa expresou ao responsable da Garda Civil “a súa preocupación” polos feitos rexistrados recentemente e confirmou que xa trasladou esta situación ao delegado do Goberno en Galicia, Pedro Branco, solicitando un incremento de efectivos destinados á comandancia que dá servizo a Teo e á súa contorna.
Ademais da petición de máis persoal, o Concello de Teo está a estudar outras medidas orientadas a mellorar a disuasión e a sensación de seguridade no municipio. Entre as propostas expostas pola alcaldesa atópase a instalación de cámaras de vixilancia en diferentes puntos do termo municipal, así como o reforzo do cadro de persoal da Policía Local, co obxectivo de intensificar a presenza policial e a capacidade de resposta.
Desde o executivo local sinalan que estas actuacións buscan previr novos incidentes e dar resposta ás inquedanzas da veciñanza, ao tempo que se mantén a coordinación cos distintos corpos de seguridade que operan na comarca de Santiago.
