Un grupo de 14 corredores de montaña percorreu este domingo os 51 quilómetros que separan Melide de Santiago de Compostela nunha acción reivindicativa coa que quixeron expresar o seu desacordo cos proxectos industriais de Altri en Palas de Rei e coa posible reapertura da mina de Touro-O Pino, promovida por Cobre San Rafael. A iniciativa, deseñada polos propios deportistas, contou co respaldo das plataformas veciñais Ulloa Viva e Mina de Touro-O Pino Non, que levan anos mobilizadas contra ambas propostas.
A carreira partiu ás 07:30 desde Melide e seguiu un tramo do Camiño de Santiago, que os participantes completaron en algo máis de seis horas. Chegaron ao Obradoiro ás 13:30, tras facer unha breve parada de avituallamento no Monte do Gozo. Alí esperábaos un grupo de compañeiros e medios de comunicación que seguían de preto unha acción que pretende sumar forza social fronte a estes proxectos.
Segundo explicou Che Cancelo, voceira da Plataforma Veciñal contra a Mina de Touro-O Pino, a proposta naceu de maneira espontánea entre deportistas que viron na carreira unha fórmula para “visibilizar a necesidade que hai de parar estes proxectos”. Cancelo cualificou Altri e a reapertura da mina como os “perigos ambientais máis importantes” que afronta Galicia na actualidade e subliñou que “a presión social é a única forma de parar estes proxectos”.
A plataforma lembra que a mobilización deste domingo funciona como antesala da manifestación convocada para o 14 de decembro, unha cita que aspira a seguir o camiño da protesta de 2024, que desbordou a praza do Obradoiro. Para Cancelo, resulta “importantísimo presionar nestes momentos”, xa que, ao seu xuízo, “o Goberno galego está a facilitar ás empresas”.
