O portavoz das edilas non adscritas no Concello de Santiago, Gonzalo Muíños, elevou este domingo a presión sobre o Goberno municipal ao advertir de que, se non se produce unha solución inmediata ao conflito aberto no servizo de bombeiros, a alcaldesa Goretti Sanmartín debería “ofrecer algún cambio no seu Goberno”.
Segundo explicou nunha comunicación remitida aos medios, a xornada volvía comezar cun parque “sen capacidade operativa”, ao dispoñer unicamente de tres efectivos e ningún mando. Esta situación faría que, en caso de emerxencia, “os tres profesionais terían que actuar sen supervisión e sen que ninguén asuma a responsabilidade do que poida ocorrer”, expuxo.
Muíños indicou que o servizo non cumpre nin o mínimo de 12 persoas por quenda que marca o Plan de Emerxencias Municipais, nin o “operativo” de nove efectivos, o que ao seu xuízo evidencia unha falta de planificación. Na súa valoración, a crise actual responde “exclusivamente a unha xestión neglixente dos recursos humanos”, que inclúe tanto o “acumulo de máis de dous millóns de euros en horas extraordinarias sen pagar a Policía Local e bombeiros” como a “incapacidade absoluta” do Executivo para avanzar na negociación cos sindicatos.
Para o concelleiro non adscrito, resulta “incomprensible” que o conflito continúe máis dun mes despois do seu estalido, e que o Goberno local “siga sen resolver este problema cos traballadores nin lograr un acordo cos representantes sindicais”.
O edil lembrou ademais que permanecen sen convocar 12 prazas correspondentes ás ofertas de emprego de 2023 e 2024, o que, ao seu entender, agrava a falta de persoal estrutural no servizo. Por iso, concluíu cun ultimato: “ou se alcanza unha solución canto antes ou a señora Sanmartín deberá ofrecer algún cambio no seu Goberno. Isto non pode seguir así unha semana máis”.
