Os traballadores e traballadoras de Ence en Lourizán volveron sacar o conflito laboral fóra da comarca de Pontevedra e trasladaron este xoves as súas protestas a Compostela. Á primeira hora da mañá concentráronse diante da sede da Confederación de Empresarios de Galicia (CEG), onde advertiron que intensificarán as mobilizacións contra o expediente de regulación de emprego (ERE) anunciado pola compañía, que continúa en fase de negociación.
A representación sindical confirmou que o martes retomarán a folga e conducirán de novo as protestas cara á capital galega. Nesa mesma xornada teñen previsto concentrarse fronte ao complexo administrativo de San Caetano, sede do Goberno galego, para reclamar ser recibidos polo presidente da Xunta, Alfonso Rueda, e pola conselleira de Industria, María Jesús Lorenzana. Segundo explicou o comité, ambas figuras foron solicitadas para unha reunión “sen obter resposta ata o de agora”.
Baixo a pancarta ‘Non á perda de postos de traballo’, o presidente do comité, Santiago Cerqueiro, advertiu que a xuntanza celebrada este xoves coa dirección volveu concluír “sen avances”, polo que as partes volverán reunirse o 11 de decembro. O calendario xoga en contra dos empregados, xa que o prazo do ERE remata o día 20.
Pola súa banda, a empresa mantivo o seu posicionamento inicial e insistiu en que a proposta forma parte dun “plan de eficiencia e competitividade” para o período 2025-2027, baseado en dous elementos: a incorporación de solucións de intelixencia artificial e a automatización e reingeniería de procesos, así como a racionalización das operacións.
