A praza Roxa converterase, un ano máis, nun dos principais epicentros do Nadal compostelán. A concelleira de Dereitos e Servizos Sociais, Promoción Económica e Xuventude, María Rozas, e a concelleira de Capital Cultural, Míriam Louzao, presentaron a programación completa da Carpa Roxa, un espazo que, segundo destacaron, busca ofrecer “moitos motivos para saír á rúa” e contribuír tamén á activación do comercio local durante as festas.
Rozas subliñou que a carpa, consolidada xa como “un punto de referencia no Nadal de Santiago”, funcionará desde o venres 5 de decembro cunha oferta que suma máis de 30 actividades de acceso libre: música, obradoiros, contacontos, cinema e espectáculos dirixidos a públicos moi diversos. O obxectivo, dixo, é que “os veciños e veciñas atopen múltiples propostas das que participar ao longo de todo o mes”.
MÚSICA PARA TODOS OS PÚBLICOS: SON XOVE E SON VERMÚ
A programación inclúe as dúas liñas musicais xa habituais: Son Xove e Son Vermú.
O Son Xove reunirá en horario de tarde ás bandas que ensaian nos locais do Centro Xove da Almáciga, reforzando a aposta polo talento emerxente da cidade. O primeiro concerto será o venres 12 coa Xuntanza de Nadal, na que músicos de diferentes grupos interpretarán versións coñecidas polo público. Nas semanas seguintes pasarán polo escenario Lundes, Wir Nois, Patrick e Paula Ferraz, Vareixa e Allo Negro, sempre ás 20:00.
Os sábados ao mediodía regresan tamén os Son Vermú, sesións de música galega ás 13:00. Abrirá o ciclo este mesmo 7 de decembro a cantautora ferrolá Lola India, seguida de Unto Bello (día 13), Sofía Espiñeira (día 20), Laura Lamontagne (27 de decembro) e Lou, que presentará o seu primeiro disco o 3 de xaneiro.
A carpa acollerá ademais actuacións especiais, como o concerto de Suzuquiños o domingo 21 ás 12:00, cun repertorio clásico de Nadal mesturado con arranxos de jazz.
RUADAS, MÚSICA ITINERANTE E RULETA DE PREMIOS
O departamento de Comercio reforza o programa con iniciativas pensadas para animar a circulación polas rúas do Ensanche e do casco histórico. As ruadas de Nadal achegarán o espectáculo ‘Tenro Inverno’ de Animatium a diferentes barrios, e o ciclo Corofonís, en colaboración coa Asociación de Música ao Vivo, levará actuacións corais a espazos como o Obradoiro, Cervantes, o Mercado de Nadal ou a intermodal.
A tradicional ruleta de agasallos, que permite participar cun ticket de compra de 5 euros no comercio local, instalarase na praza Roxa o sábado 13 e trasladarase á carpa da Alameda o 3 de xaneiro.
Tamén se manterá o tren infantil de Nadal, operativo entre o 12 e o 28 de decembro en horario de tarde, e en xornada completa a partir das vacacións escolares. No Obradoiro, as pequenas atraccións de madeira —nora, barca e carrusel— funcionarán venres, sábado e domingo de 17:30 a 20:30, ampliando despois a súa actividade a toda a semana.
Rozas lembrou ademais que xa está en marcha o mercado de Nadal da Carreira do Conde, con case 90 expositores e un espazo infantil con 40 obradoiros, e que o día 20 abrirá o mercado adicional de Área Central.
‘É DOMINGO’ E IMPROVISACIÓN
A concelleira Míriam Louzao explicou as novidades impulsadas desde Cultura, destacando que este Nadal se reforza o apoio ao talento artístico compostelán. Entre elas, a creación do ciclo E-Domingo, con espectáculos participativos orientados ao público adulto todos os domingos ás 18:00.
A programación ábrese o 7 de decembro coa ‘Discoteca de señoras e señores tamén’, dirixida pola bailarina Marta Alonso, con dúas sesións —a segunda, o día 28, coa participación de señora DJ. O ciclo inclúe tamén ao dúo Eva e Camilo (día 14) e dous bingos musicais especiais: un dedicado á lotaría de Nadal (día 21) e outro ás festas de Reis (4 de xaneiro).
A improvisación teatral terá dous encontros co Colectivo do Flow, que presentará o Impro de Nadal os días 5 e 27 de decembro, tamén ás 18:00, con propostas centradas en darlle voz a elementos simbólicos das festas.
As familias terán un amplo programa propio. Os obradoiros comezan o 7 de decembro con creación de monicreques e continúan o 8, 22, 23 e 24 con elaboración de adornos, cartas ao Apalpador e variñas de Nadal, en colaboración co Fallado de Nin e Semente Compostela. O 19 de decembro, a tradicional ruada do Apalpador partirá da Xuntanza do Pichel ás 18:30.
O apartado de maxia trae dúas citas: Dani Polo o sábado 6 ás 18:00 e Mago Rafa o domingo 14 ás 12:00.
A carpa adicará tamén espazos ao cinema grazas á colaboración con Numax, con sesións de curtas infantís o 22 de decembro e curtas galegas para público adulto o 29, ambas entre 18:00 e 20:00.
O calendario complétase co concerto especial de Nadal de Broken Pitch, que terá lugar o martes 23 ás 18:00.
