O BNG reclamou á Consellería de Educación máis profesorado especialista no CEIP Monte dos Postes de Santiago e o conselleiro, Román Rodríguez, defendeu que a dotación é a adecuada.
Nunha resposta a unha pregunta oral na Cámara galega, o responsable de Educación acusou aos nacionalistas de “tentar xerar un discurso negacionista” do conxunto do sistema educativo de Galicia e de practicar “propaganda á inversa”.
Así respondeu a unha pregunta da parlamentaria nacionalista Saleta Chao sobre as demandas da comunidade educativa do CEIP Monte dos Postes, en Santiago, relativas á dotación deste centro de profesorado especialista e persoal coidador.
O conselleiro, que iniciou a súa quenda de palabra relacionando as Anpas da capital galega co concello, asegurou que o BNG colle “un caso concreto e tenta xerar un discurso negacionista da realidade” para “converter en verdade o que é unha absoluta mentira”.
Con todo, a parlamentaria do BNG reprochou que non se trata de “casos puntuais” se “todas as semanas” expoñen problemas de falta de profesorado “en centros de todo o país”.
En concreto, sobre o CEIP Monte dos Postes, Román Rodríguez detallou que conta cunha oferta de 455 prazas, das que hai 70 vacantes. Tamén apuntou que “se cumpren todas os cocientes” e o profesorado “está por encima do catálogo”.
