A parroquia compostelá de Laraño conta xa cos novos paneis acústicos translúcidos instalados por Adif, unha actuación que substitúe as pantallas opacas inicialmente previstas e que foran rexeitadas polos residentes polo seu impacto visual. O Delegado do Goberno en Galicia, Pedro Blanco; a concelleira socialista, Marta Abal, e o deputado no Parlamento de Galicia e secretario xeral local do PSdeG, Aitor Bouza, visitaron este luns a zona para comprobar o resultado da obra, que pon fin a meses de reivindicacións da veciñanza.
Durante a visita, Bouza explicou que a modificación do proxecto foi posible tras un proceso continuado de diálogo co barrio iniciado hai un ano. Indicou que o partido trasladou ao Goberno central as preocupacións da parroquia e incidiu en que “o fundamental é escoitar; cando se fai, a veciñanza queda satisfeita coa xestión”. O responsable socialista apuntou que a solución executada responde exactamente ao que pedían os residentes: “Os veciños pedían paneis translúcidos, e iso é o que se instalou”, destacou, valorando que Adif e o Executivo estatal atendesen esa demanda específica.
Bouza enmarcou esta intervención nunha forma de traballo que, ao seu xuízo, debería guiar a acción pública: proximidade, revisión das actuacións e corrección dos erros cando xorden desacordos. “O noso compromiso é reorientar e mellorar o que non se faga ben, como fixemos en Laraño”, afirmou. Nesta liña, contrastou o proceso seguido nesta parroquia coa tramitación doutros asuntos municipais que xeran preocupación entre os residentes doutras zonas de Santiago, asegurando que o caso de Laraño “evidencia que non se poden tomar decisións sen ter en conta ás parroquias e aos colectivos afectados”.
O deputado avanzou que o PSdeG manterá esta metodoloxía de traballo nas distintas áreas rurais do municipio, cun labor centrado na escoita activa e no acompañamento ás demandas cidadás. “Imos seguir traballando da man da veciñanza”, asegurou, engadindo que, cando se detecten aspectos mellorables, o compromiso socialista será “reorientar, corrixir e mellorar”. Concluíu que a prioridade do partido pasa por atender as necesidades dos barrios e parroquias: “O que nos importa é a veciñanza, os seus problemas, e ese é o noso pacto maior”.
