A tarde de mañá venres marcará o inicio oficial do Nadal en Brión, que celebrará na Praza das Polbeiras de Santa Minia e na súa contorna unha ampla proposta de actividades abertas á veciñanza. O Concello programou unha Feira de Nadal que reunirá artesanía, gastronomía, obradoiros e música tradicional, ademais do acendido do alumeado festivo, nunha xornada pensada para todos os públicos e con acceso libre.
Entre as 16:00 e as 20:00, a praza converterase nun espazo de encontro arredor dunha feira na que participarán arredor dunha quincena de postos con produtos artesáns, oferta gastronómica, elaboracións da horta, doces e embutidos. En paralelo, desenvolveranse diferentes obradoiros, orientados tanto a persoas adultas como ao público infantil. A programación inclúe propostas de decoración de Nadal, cociña e sobremesas propias destas datas, a creación de pousavasos temáticos e a presenza dun Apalpador Móbil, que animará o ambiente festivo.
O momento central da tarde chegará ás 18:30, co acendido do alumeado de Nadal, acto que estará presidido polo alcalde, Pablo Lago Sanmartín. A iluminación inaugural correrá a cargo dun neno ou nena participante na festa, escollido por sorteo entre as persoas presentes. A continuación dará comezo un magosto popular, acompañado de música tradicional en directo.
Durante o magosto, a organización ofrecerá castañas, chocolate con churros e bebida de maneira gratuíta, coa intención de favorecer a participación e converter a velada nun encontro comunitario que dea a benvida á época festiva no municipio.
A Feira de Nadal está promovida polo Concello de Brión e conta coa colaboración da Deputación da Coruña, que apoia esta iniciativa co obxectivo de dinamizar a vida social e cultural do territorio ao inicio da campaña de Nadal.
