A Praza de Abastos de Santiago converteuse este martes no escenario de lanzamento da campaña ‘Prato de Mercado’, unha iniciativa da Xunta que busca reforzar a relación entre os mercados tradicionais galegos, os seus produtores e a restauración de referencia. O acto reuniu arredor dunha trintena de profesionais da cociña, entre eles varios chefs composteláns que fixeron fincapé no papel que xoga o mercado como espazo esencial de abastecemento e no impacto que o produto de proximidade ten na gastronomía local.
O chef Martín Pais, do restaurante Orixe, sintetizou esta idea lembrando que a Praza é “a nosa despensa”, un espazo no que se concentra o traballo diario de produtores que achegan produtos frescos e de Galicia. A el sumáronse 34 chefs de 31 restaurantes que percorreron os postos do mercado na acción inaugural da campaña, que prevé desenvolver ao longo de 2026 un calendario de actividades como showcookings e demostracións culinarias nos case cen mercados de toda Galicia.
Tamén participou o chef compostelán Sergio Delpont, de O Sendeiro, quen cualificou o proxecto como “emocionante” porque contribuirá, segundo dixo, a manter a aposta dos restaurantes galegos polo produto local. Para Delpont, a gastronomía e a hospitalidade son “a máxima diferenciación” de Galicia, polo que considerou que iniciativas como esta favorecen que a cociña galega continúe avanzando.
Outro dos nomes presentes foi o de Lucía Freitas, estreitamente vinculada á Praza de Abastos polos seus negocios situados ao carón do mercado. A chef destacou a “sorte” de traballar a diario rodeada de produto fresco e incidiu en que percorrer os postos e escoller cada ingrediente é fundamental para a identidade da súa cociña. “A miña despensa é o mercado de abastos. Eu non cambiaría isto por nada no mundo”, afirmou, ao tempo que asociou esta maneira de traballar a unha “riqueza” para todo o territorio.
A mesma visión compartiu Álex Ferreiro, tamén de O Sendeiro, quen insistiu na importancia de adquirir a maior parte dos ingredientes na Praza. Citou produtos como o berberecho ou a pescada de Celeiro, que forman parte habitual da carta do restaurante e que, segundo subliñou, os clientes valoran especialmente cando proceden do mercado compostelán. Para Ferreiro, Galicia dispón dunha “despensa enorme” grazas ao mar, ao gando e á terra, unha combinación que “marca a diferenza” fronte a outras rexións.
O acto contou tamén coa presenza do conselleiro de Emprego, Comercio e Emigración, José González, quen explicou que ‘Prato de Mercado’ supón un reforzo da aposta da Xunta polas prazas de abastos. O programa pretende fortalecer o vínculo entre produtores e profesionais da cociña, apoiar o consumo de proximidade e avanzar na creación de “mercados excelentes” que combinen produto fresco, artesanía e experiencias culinarias.
González destacou que o obxectivo é impulsar estes espazos como centros de dinamización económica e cultural, con actividades que inclúan desde demostracións gastronómicas até accións de promoción da artesanía galega, lembrando que máis de 50 artesáns comercializan xa as súas pezas en restaurantes nacionais e internacionais.
O arranque compostelán da campaña deixa así patente o peso da Praza de Abastos como referente gastronómico e punto de encontro entre produtores e restauradores, nun contexto no que o sector reivindica a materia prima galega como sinal de identidade e garantía de calidade.
