A corporación municipal de Santiago fixo este luns unha chamada conxunta á “tolerancia cero” ante a violencia machista, nun acto institucional celebrado no Pazo de Raxoi con motivo do Día Internacional para a Eliminación da Violencia contra as Mulleres. A sesión, á que asistiron representantes de todos os grupos políticos e alumnado do IES Antonio Fraguas e do IES de Sar, serviu para expresar o apoio do Concello ás mobilizacións convocadas polo movemento feminista este 25 de novembro.
A alcaldesa Goretti Sanmartín abriu o encontro cunha mensaxe clara sobre a necesidade de manter o compromiso público contra as agresións machistas. A rexedora advertiu de que “non se pode dar nin un paso atrás” e subliñou que “non teñen cabida os discursos de odio nin os discursos negacionistas da violencia de xénero”. Sanmartín explicou que a campaña municipal deste ano pon o foco na violencia dixital, lembrando que “tres de cada catro novos reciben de maneira habitual comentarios violentos sobre o seu físico ou con referencias de contido sexual”.
Durante o acto interviñeron varias alumnas compostelás convidadas polo Concello, que puxeron enriba da mesa a dimensión estrutural da violencia de xénero e as súas consecuencias na vida cotiá. As mozas lembraron que esta violencia “non é un problema individual nin puntual”, senón “un sistema enteiro que quere ás mulleres en silencio”. Nunha lectura colectiva, describiron situacións habituais como non poder camiñar soas pola noite, a presión por compartir a ubicación ou o uso do móbil como “escudo” ante posibles riscos. Tamén abordaron prácticas recorrentes no ámbito dixital como o body counting, o cibercontrol, a xeolocalización ou a difusión de imaxes sen consentimento, e denunciaron a discriminación que sofren as mulleres migrantes e racializadas.
A lectura da declaración institucional comezou coa concelleira non adscrita Mercedes Rosón, que insistiu en que os avances dos últimos anos non permiten baixar a garda, dado que os datos de vítimas seguen a ser alarmantes. A socialista Marta Abal engadiu que a coordinación entre institucións “só é efectiva se conta cunha dotación de recursos económicos e persoais suficientes”.
O edil popular Borja Rubio subliñou a importancia de reforzar o acompañamento psicolóxico ás vítimas, impulsar axudas específicas para as afectadas por violencia sexual, mellorar a formación do persoal encargado da atención e garantir un plan de educación afectivo-sexual no ensino. Desde Compostela Aberta, a tenente de alcaldesa María Rozas lembrou que o Concello leva tempo aplicando medidas no marco das súas competencias, aínda que “queda moito por facer”.
A portavoz do Executivo local e concelleira do BNG, Míriam Louzao, pediu apoiar as mobilizacións deste martes e reclamou máis recursos ao amparo do Pacto de Estado contra a Violencia de Xénero, ademais de manter campañas de sensibilización estables. Para pechar o acto, Goretti Sanmartín situou como prioridade avanzar no V Plan de Igualdade do Concello e reclamou á Xunta incrementar o financiamento dos centros de información ás mulleres para “baixar os cocientes e garantir o traballo preventivo e de intervención”.
