A Praza do Obradoiro acolleu este domingo unha concentración na que máis dun centenar de persoas expresaron o seu apoio ao fiscal xeral do Estado, Álvaro García Ortiz, despois de facerse pública a condena do Tribunal Supremo que establece a súa inhabilitación por dous anos. A mobilización, segundo trasladaron varios asistentes, xurdiu a través das redes sociais e sen organizacións detrás da convocatoria.
Ao longo da protesta escoitáronse consignas como ‘Na xustiza non ao golpe de estado’, ‘Tribunal Supremo dimisión’, ‘Renovación do poder xudicial’ ou ‘Álvaro, amigo, Santiago está contigo’, nun ambiente no que se pedía unha reforma profunda do sistema xudicial e se cuestionaba o fallo do alto tribunal. A marcha compostelá formou parte dun movemento máis amplo que tivo réplicas noutras cidades galegas, entre elas A Coruña, onde se reuniron centenares de persoas fronte ao Obelisco.
Entre quen tomou a palabra, o antigo reitor da USC, Carlos Pajares, criticou o comportamento do Supremo ao afirmar que “ten unha traxectoria de incompetencia e de ser uns ‘hooligans’ da dereita”. Outras voces, como a da asistente Eva Vidal, cualificaron a resolución de “inxusta” e lembraron que a sentenza completa aínda non se fixo pública. Vidal insistiu en que o que se reclama é “unha España democrática e libre”.
Tamén participou na concentración Javier, quen reclamou unha xustiza “máis transparente e menos retorta”, á vez que valorou que a condena estaba “cociñada desde o principio”. Engadiu que o asunto “é moi simbólico” e advertiu das consecuencias que, ao seu xuízo, pode ter “convertelo nun ‘modus operandi’ que nos poida afectar a todos”.
A mobilización compostelá contou ademais coa presenza de representantes políticos, como Paulo Carlos López, secretario xeral de Movemento Sumar Galicia, ou Aitor Bouza, secretario xeral do PSdeG en Santiago. Segundo sinalaron varios asistentes, o obxectivo común era reclamar maior transparencia, garantías democráticas e unha renovación dun poder xudicial bloqueado desde hai anos.
